मुंबई : पाडवा मेळाव्यातील सभेत मनसे अध्यक्ष राज ठाकरेंनी दिलेल्या इशाऱ्यानंतर पोलिसांकडून माहिममधील अनधिकृत मजारीवर कारवाई करण्यात आली आहे. या कारवाईनंतर मनसेकडून ट्विटद्वारे प्रतिक्रिया देण्यात आली आहे.

मनसेच्या अधिकृत ट्विटर हँडलवरुन पोलिसांच्या या कारवाईचं स्वागत करण्यात आलं आहे. यामध्ये राज ठाकरे यांचा पाडवा मेळाव्यातील भाषणाचा फोटो पोस्ट करत त्यावर महाराष्ट्रात अनधिकृत मजारींची मुजोरी चालणार नाही, असं लिहित. उखाड दिया! असं लिहिलं आहे. तसेच या फोटोला गड्यांनो...माहिमची मोहीम फत्ते झाली, मजारीची मुजोरी उखडून टाकली! अशी कॅप्शन देण्यात आली आहे.

दरम्यान, पाडवा मेळाव्यात राज ठाकरे यांनी स्क्रीनवर माहिमच्या समुद्रात एका बेट सदृश्य जागेत एक मजार तयार करण्यात आल्याचा व्हिडिओ दाखवला होता. या मजारीला भेट देण्यासाठी अनेक लोकांची ये-जा सुरु असल्याचंही त्यांनी या व्हिडिओचा संदर्भ देत सांगितलं होतं. तसेच या ठिकाणी दुसरं हाजीआली तयार होत असल्याचा आरोप करत शासनाचं दुर्लक्ष असलं की असे अनधिकृत बांधकामाचे प्रकार होत असतात असा आरोपही केला.

हेही वाचाः झोप नीट लागायला हवी? मग हे वाचाच

तसेच जर हे अतिक्रमण शासनानं हटवलं नाही तर त्याच्या शेजारीच आम्ही गणपतीचं मंदिर उभारू असा इशाराही राज ठाकरे यांनी राज्य शासनाला दिला होता. राज ठाकरेंच्या या इशाऱ्यानंतर दुसऱ्यादिवशी सकाळीच हे अनधिकृत बांधकाम हटवण्याची मोहिम राज्य शासनाकडून हाती घेण्यात आली.