राज्यातल्या गेल्या काही दिवसांपासून सत्तानाट्याचा खेळ सुरू आहे. या काळातल्या घडामोडींचा फायदा मनसे आपल्या पक्षबांधणीसाठी करुन घेत आहे. मनसे नेत्यांच्या सातत्याने होणाऱ्या बैठका, राज ठाकरेंचे पुत्र अमित ठाकरेंचे सातत्याने होणारे दौरे या सगळ्याची चांगलीच चर्चा आहे.

अमित ठाकरेंच्या दौऱ्यांची काही ना काही कारणाने चर्चा सुरू असते. कधी रेल्वेप्रवास असेल, कधी फुटबॉल खेळणं असेल. आता पुन्हा एकदा अमित ठाकरेंची (Amit Thackeray) चर्चा रंगली आहे. या चर्चेचं कारण म्हणजे त्यांची एक कृती. तर झालं असं की, राज ठाकरेंच्या घरी यंदा नातवाचं आगमन झाल्यानं त्यांनी घरी गणपती बसवला आहे. त्यांच्या गणपतीचं दर्शन घेण्यासाठी यंदा अनेक नेते त्यांच्या घरी भेट देत आहेत.

दरम्यान, मनसेच्या प्रवासात पहिल्यापासून राज ठाकरेंच्या सोबत असणारे बाळा नांदगावकरही राज ठाकरेंच्या घरी गणेशोत्सवासाठी आले होते. यावेळी त्यांचं फोटोशूट सुरू होतं. फोटो काढताना शर्मिला ठाकरे, राज ठाकरे, त्यांच्या बाजूला अमित ठाकरे आणि त्यांच्या बाजूला कोपऱ्यात बाळा नांदगावकर उभे होते. मात्र तेवढ्यात अमित ठाकरेंनी बाळा नांदगावकरांना (Bala Nandgaonkar) बाजूला सारलं आणि त्यांना राज ठाकरेंच्या (Raj Thackeray) शेजारी उभं केलं.

अमित ठाकरेंच्या या कृतीची सध्या चांगलीच चर्चा सुरू आहे. मनसेच्या अनेक नेत्यांसोबतच सोशल मीडियावरही हा व्हिडीओ व्हायरल होत आहे. सन्मान देणं काय असतं हे अमित ठाकरेंकडून शिकावं, अशा आशयाच्या प्रतिक्रिया नेटकरी या व्हिडीओवर देत आहेत.