मुंंबई : पावसाळ्यात पर्यटकांनी फिरायला जाताना निष्काळजीपणा केल्यामुळे अनेकांची जीव गेल्याच्या घटना घडल्या आहेत. कधीकधी निष्काळजीपणा जीवावर बेतू शकतो हे सर्वांना माहिती असूनही अनेकजणांना कळत नाही आणि नाहकपणे आपला जीव गमावून बसतात. सध्या मुंबईतील असाच एक व्हिडिओ व्हायरल झाला आहे.

अधिक माहितीनुसार, ही घटना मुंबईतील बांद्रा बँडस्टँड येथे घडली आहे. गौतमनगर येथील रहिवाशी असलेले मुकेश सोनार (३५) आणि त्यांची पत्नी ज्योती सोनार (३२) असं या दाम्पत्याचं नाव असून ज्योती यांचा या घटनेत मृत्यू झाला आहे. तर मुकेश हा एका खासगी कंपनीत तंत्रज्ञ म्हणून काम करतो. या घटनेतून इतरांनी बोध घ्यावा आणि सोशल मीडियामुळे होणाऱ्या नुकसानीपासून वाचण्याचे अवाहन केले आहे असं वृत्त मिड-डे या वृत्तवाहिनीने दिलं आहे.

दरम्यान, हे कुटुंब समुद्र किनाऱ्यावर फिरायला गेले असताना मुकेश आणि ज्योती समुद्रातील दगडावर फोटो काढण्यासाठी थांबलेले दिसत आहे. तर दोन ते तीन लाटा येईपर्यंत ते त्याच दगडावर बसलेले आहेत. पाठीमागे त्यांच्या लहान लहान मुलांचा आवाज ऐकायला येत आहे.

दरम्यान, काही क्षणात एक मोठी लाट येते आणि त्यामध्ये ते दोघेही वाहून जातात. पण मुकेश स्वत:चा जीव वाचवण्यात यशस्वी होतो आणि ज्योती लाटेत वाहून जाते. ती वाहून गेल्यानंतर त्यांची लेकरं मम्मी... मम्मी... म्हणत आर्तपणे हाक मारत आहेत. लेकरांचा आवाज ऐकून हृदय पिळवटून निघते. "तर यांना बऱ्याच वेळापासून म्हणतोय वर या वर या तर ऐकलं नाही" असं एक व्यक्ती बोलत आहे.

सदर जोडप्याच्या निष्काळजीपणामुळे दोन लेकरं पोरकी झाले आहेत. पालकांनी अशा धोकादायक ठिकाणी फिरायला जाताना काळजी घ्यायला पाहिजे. त्याचबरोबर आपल्या पाठीमागे परिवारात लहान मुले आहेत याची किमान जाणीव ठेवायला पाहिजे. सध्या हा व्हिडिओ सोशल मीडियावर चांगलाच व्हायरल झाला आहे.