Mumbai Airport customs Caught wildlife smuggling : मुंबई विमानतळ अर्थात छत्रपती शिवाजी महाराज आंतरराष्ट्रीय विमानतळावर एक धक्कादायक घटना उघडकीस आली आहे. या ठिकाणी  कस्टम अधिकाऱ्यांनी आज(शनिवारी) तपासणीदरम्यान एका प्रवाशाच्या बॅगेतून चक्क 'रॅकून', काळा कोल्हा आणि 'इगुआना'सह ४५ वन्य प्राणी जप्त केले आहेत. हा प्रवासी थाई एअरवेजने मुंबईत पोहोचला होता.

विमानतळावर उपस्थित असलेल्या अधिकाऱ्याने सांगितले की, पहाटे थाई एअरवेजच्या विमानाने मुंबईत पोहोचताना या प्रवाशाला पकडण्यात आले. बॅगेची झडती घेताना कस्टम विभागाच्या पथकाला प्रवाशाच्या बॅगेतून तब्बल ४५ प्राणी सापडले.

याबाबत माहिती देताना अधिकाऱ्यांनी सांगितले की, हे प्राणी तस्करीद्वारे आणले जात होते. प्रवाशाच्या बॅगेत ठेवलेले अनेक प्राणीही गुदमरून मृत्युमुखी पडले होते. या प्राण्यांमध्ये 'रॅकून', 'हायराक्स (जे सशासारखे दिसतात)', काळा कोल्हा आणि 'इगुआना' इत्यादींचा समावेश होता.

याशिवाय अधिकाऱ्याने अशीही माहिती दिली की 'रेस्क्विंक असोसिएशन फॉर वाइल्डलाइफ वेल्फेअर'च्या तज्ञांनी प्राण्यांची काळजी घेण्यात आणि त्यांना स्थिर करण्यात मदत केली, जे वन्यजीव संरक्षण कायद्याच्या तरतुदींनुसार त्यांच्या मूळ देशात परत पाठवले जातील.

गेल्या ३५ दिवसांत मुंबई विमानतळावर ३८० प्राण्यांची तस्करीची प्रकरणे नोंदवली गेली आहेत, ज्यात शुगर ग्लायडर, पिट व्हायपर आणि हनी बेअर सारख्या १५ वेगवेगळ्या प्रजातींचा समावेश आहे. जून २०२५ मध्ये, साप, इगुआना आणि संरक्षित प्रजातींसह २८४ विदेशी प्राण्यांशी संबंधित चार प्रकरणे नोंदवली गेली. सर्व प्राणी जप्त करण्यात आले. तसेच, पाच जणांना अटकही करण्यात आली आहे.