मुंबई: कोरोनाचा प्रादुर्भाव वाढत असताना लसीकरण मोहिमेने वेग घेतला होता. मुंबईसह राज्यात अनेक ठिकाणी दिवसागणिक लाखांच्या संख्येने लसीकरण केलं जात होतं. पण गेले काही दिवसांपासून राज्याकडे असलेला लससाठा संपत आल्याचे चित्र होते. त्याचीच प्रचिती आज मुंबईकरांना आली. मुंबईच्या बीकेसी येथील लसीकरण केंद्रावर नागरिक लस घेण्यासाठी पोहोचले पण लससाठा उपलब्ध नसल्याने त्यांना नाईलाजाने घरी परतावे लागले. मुंबईतील अनेक लसीकरण केंद्रांवर अशीच परिस्थिती दिसून आली. लस नव्हती तर आधीच का सांगितलं नाही असा संतप्त सवाल नागरिकांकडून सध्या विचारण्यात येत आहे.

"म्हणून राज्यात कोरोना पुन्हा वाढला"; उद्धव ठाकरेंची कबुली

लससाठा संपुष्टात येण्याबाबत मुंबईच्या महापौर यांनी आपली प्रतिक्रिया दिली. "नायर हॉस्पिटलध्ये १ दिवसाचा साठा शिल्लक आहे. कस्तुरबा, सायन या हॉस्पिटल्समध्ये साठा संपलाय. केइएम मध्ये १ दिवसाचा साठा आहेत तर माहिम केंद्रावर साठा शिल्लक नाही. अशी सध्याची मुंबईतील परिस्थिती आहे. पुण्याच्या सीरममधून आज १ लाख ७६ हजार लसी मिळणार असं ऐकलंय पण त्यादेखील अपुऱ्याच पडतील. कारण दिवसाला ५०-६० हजार लसीकरण आपण करतोय. त्यामुळे दुसऱ्या डोसवाल्यांना काही काळ वाट पाहावी लागू शकतो", असे पेडणेकर म्हणाल्या.

'वर्क फ्रॉम होम'मुळे लोकलमधील गर्दीत घट

"सध्या अनेक नागरिक लसीकरण केंद्रावर येत आहेत पण लससाठा नसल्याने त्यांचा हिरमोड होताना दिसतोय. अशा परिस्थितीत या नागरिकांना लस आल्यावर पुन्हा बोलावण्यात आलं तर किती लोक रस दाखवतील याबद्दल शंका आहे. प्रसारमाध्यमे दाखवत आहेत की लससाठा नाही, तरीही लोक येत आहेत. केंद्रातून लसी कधी मिळणार माहिती नाही. त्यांचीही काही अडचण असावी. पण सध्या चिंता ही आहे की नागरिक केंद्रावर येऊन लस नाही असं ऐकतायत, ते परतताना कोरोनाचं संकट घेऊन जाऊ नये", असंही त्या म्हणाल्या.