मुंबई : केईएम रुग्णालयातील (KEM Hospital) एमबीबीएसच्या (MBBS Doctors) दुसर्‍या वर्गातील 40 पेक्षा अधिक डॉक्टरांना कोरोनाची लागण (corona infection) झाल्याची घटना ताजी असतानाच आता केईएममधील क्लिनिकल फार्माकोलॉजी विभागातील आणखी नऊ डॉक्टर व कर्मचार्‍यांना कोरोनाची लागण झाल्याचे उघडकीस आले आहे. त्यामुळे सर्व खबरदारी (precaution) घेऊनही बाधा झाल्याने चिंता व्यक्त होत आहे.

केईएम रुग्णालयातील क्लिनिकल फार्माकोलॉजी विभागातील नऊ जणांना कोरोनाची लागण झाल्याचे उघडकीस आले आहे. यामध्ये काही डॉक्टर व कर्मचार्‍यांचा समावेश आहे. त्यामुळे रुग्णालयातील कर्मचार्‍यांमध्ये भीतीचे वातावरण निर्माण झाले आहे. केईएम रुग्णालयातील क्लिनिकल फार्मालॉजिकल विभाग हे रुग्णालयाच्या औषध विभागाला औषध पुरवणे, औषध निरीक्षण, क्लिनिकल ड्रग्स टॉक्सिकोलॉजी इत्यादी कामे करण्यात केली जातात.

त्यामुळे या विभागाचा रुग्णालयातील सर्व कर्मचार्‍यांशी संबंध येतो. असे असताना या विभागातील 9 जणांना कोरोनाची लागण झाली आहे. केईएम मध्ये दररोज 450 जणांचे स्क्रिनिंग करण्यात येते. आतापर्यंत 1 हजाराहून अधिक डॉक्टर आणि कर्मचार्यांची तपासणी करण्यात आली आहे. प्रत्येक विभागाचा ठराविक वेळेत आढावा घेण्यात येतो.

मागील दोन दिवसांपासून या विभागातील डॉक्टर व कर्मचार्‍यांची कोरोना चाचण्या करण्यात येत आहेत. त्यामुळे या संख्येत वाढ होण्याची शक्यता वर्तवली जात आहे. काही दिवसांपूर्वी केईएम रुग्णालयात एमबीबीएसच्या दुसर्‍या वर्गातील डॉक्टरांना कोरोनाची लागण झाली होती. त्यातच आता या विभागातील डॉक्टर व कर्मचार्‍यांना कोरोनाची लागण झाल्याने रुग्णालय परिसरात खळबळ माजली आहे. कोरोनाची दुसरी लाट ओसरली असताना तिसर्‍या लाटेची शक्यता कमी असल्याचे सांगितले जात असले तरी रुग्णालयातील डॉक्टर व कर्मचारी कोरोनाबाधित होत असल्याने तिसरी लाट रुग्णालयातूनच पसरण्याची शक्यता वर्तवण्यात येत आहे.

"केईएममध्ये दररोज स्क्रिनिंग होत असून, क्लिनिकल फार्माकोलॉजी विभागातील 9 डॉक्टर्स आणि कर्मचारी पॉझिटिव्ह आले आहेत. त्यामुळे सर्व डॉक्टर आणि कर्मचार्‍यांची तपासणी सुरू केली आहे."

-डॉ.हेमंत देशमुख, अधिष्ठाता, केईएम रुग्णालय