लोअर परेल येथे राहणाऱ्या एका 24 वर्षांच्या शिक्षिकेची सोशल मीडियावर बदनामी केल्याप्रकरणी अज्ञात व्यक्तीविरुद्ध ना. म. जोशी मार्ग पोलिसांनी गुन्हा नोंदविला आहे.

आरोपीने पिडीत शिक्षिकेच्या आई-वडिलांसह मित्रांना काही अश्‍लील मेसेज आणि फोटो पाठविले असून त्याचा पोलिसांकडून शोध सुरू आहे.

तक्रारदार महिला एका खासगी शाळेत शिक्षिका आहे. 17 जानेवारीला ती नेहमीप्रमाणे शाळेत जात असताना तिचा मोबाईल पर्समधून चोरीस गेला होता. 31 जानेवारीला शिक्षिकेच्या आई-वडिलांना एका अज्ञात मोबाईलवरून अश्‍लील मेसेज आले होते.

त्यात तिच्याविषयी आक्षेपार्ह अश्लील मजकूर होता. अशाच प्रकारे काही अश्‍लील मेसेज तिच्या मित्रांनाही पाठविण्यात आले होते. त्यासोबतच तिचे तिच्या मित्रांसोबतचे काही फोटो पाठवण्यात करण्यात आले होते. शिक्षिकेच्या चोरीस गेलेल्या मोबाईलमधील फोटो अज्ञात व्यक्तीने तिच्या आई-वडिलांसह मित्रांना पाठवून तिची बदनामी करण्याचा प्रयत्न केला होता.

हा प्रकार उघडकीस येताच महीलेने ना. म जोशी मार्ग पोलिसां कडे तक्रार दाखल केली होती. तिच्या तक्रारीवर पोलिसांनी अज्ञात व्यक्तीविरुद्ध गुन्हा नोंदविला असून या प्रकरणी ना. म. जोशी मार्ग पोलीस अधिक तपास करत आहेत.