Navi Mumbai : नेरुळमधील डॉ. डी. वाय. पाटील हॉस्पिटलच्या गेटवर रविवारी (ता. २६) रात्री झालेल्या रुग्णवाहिका चालकाच्या हत्याप्रकरणात नेरुळ पोलिसांनी चारही मारेकऱ्यांना जेरबंद केले. या आरोपींमध्ये वडील व त्याच्या तीन मुलांचा समावेश असून चौघांनी हॉस्पिटलच्या गेटवर असलेल्या नारळ पाण्याच्या स्टॉलचे नुकसान केले होते.

याची माहिती मृत युवराज सिंह याने नारळपाणी विक्रेत्याला दिली होती. याच गोष्टीचा राग मनात धरून चौघा पिता-पुत्रांनी युवराज सिंह याची हत्या केल्याचे तपासात स्पष्ट झाले आहे.

हत्या प्रकरणात अटक करण्यात आलेल्यांमध्ये अमजद रियाज खान (वय ४५), त्याची मुले समीर खान (वय २४), शोएब खान (वय २२) व एक अल्पवयीन मुलगा या चौघांचा समावेश आहे. चौघे पिता-पुत्र मानखुर्द येथील पीएमजीपी कॉलनीत राहण्यास असून अमजद खान हा डी. वाय. पाटील हॉस्पिटलच्या गेटच्या बाजूला अंडाभुर्जी विक्रीचा स्टॉल लावत होता.

पाच-सहा दिवसांपूर्वी आरोपी अमजद खान याने नारळपाणी व फळविक्री करणाऱ्यांच्या स्टॉलचे नुकसान केले होते. याबाबतचा व्हिडिओ डी. वाय. पाटील हॉस्पिटलमध्ये रुग्णवाहिका चालवणाऱ्या युवराज सिंह याने काढला होता. तसेच त्याबाबतची माहिती त्याने नारळपाणी व फळ विक्रेत्यांना दिली होती. अमजद खान याला ही बाब समजल्यानंतर त्याने आपल्या मुलांच्या मदतीने युवराज सिंहचा कायमचा काटा काढण्याचे ठरवले होते.

चाकून छाती, पोटावर वार करून पलायन

आरोपी अमजद खान याने रविवारी रात्री ८ वाजण्याच्या सुमारास युवराज सिंह याला दुसऱ्यामार्फत फोन करून डी. वाय. पाटील हॉस्पिटलजवळ बोलावून घेतले. त्यामुळे युवराज सिंह हा ज्ञानेश्वर नाकाडे याच्या रुग्णवाहिकेमधून हॉस्पिटलच्या गेटवर आला असता आधीपासून त्या ठिकाणी तयारीत बसलेल्या आरोपी अमजद खान व त्याच्या तीन मुलांनी रुग्णवाहिका अडवली.

त्यातून युवराजला बाहेर खेचून त्याला बांबू व हाता बुक्क्यांनी बेदम मारहाण केली. त्यानंतर चौघांनी त्याच्या छाती, पोट व मानेवर चाकूने १४ वार करून त्याची हत्या करून पलायन केले. रुग्णवाहिका चालक ज्ञानेश्वर नाकाडे याने पोलिसांना आरोपींचे वर्णन दिले होते.

तसेच एका प्रत्यक्ष साक्षीदाराने अमजद खान व त्याच्या मुलांनी ही हत्या केल्याची माहिती नेरुळ पोलिसांना दिली होती. त्यानुसार तपास चौघा पिता-पुत्रांना अटक करण्यात आली.