Mumbai Crime : नवीन पनवेलमधील आदई गाव परिसरात बेकायदा वास्तव्यास असलेल्या चार बांगलादेशी नागरिकांना अनैतिक मानवी वाहतूक प्रतिबंधक कक्षाने नुकतीच अटक केली. यात दोन पुरुष आणि दोन महिलांचा समावेश आहे.

ते सहा महिन्यांपासून आदई गावात वास्तव्यास असल्याचे त्यांच्या चौकशीत उघडकीस आले आहे. रूपा शागर सरकार (वय २७), सुमी कोबोर शेख (वय २३), रिदाई रफिक मंडोल (वय २१) व मिनल बरल (वय ४६) अशी त्यांची नावे आहेत.

ओमसाई बिल्डिंगमध्ये मयांक ठाकूर यांच्या घरात बेकायदा राहत होते. वरिष्ठ पोलिस निरीक्षक अतुल आहेर यांनी या बांगलादेशी नागरिकांवर कारवाईच्या सूचना दिल्या होत्या. त्यानुसार सहायक पोलिस निरीक्षक शरद भरगुडे व त्यांच्या पथकाने आदई गावातील ओम साई बिल्डिंगमध्ये पहिल्या मजल्यावरील संशयीत घरावर छापा मारला.

तेथे हे सर्वजण राहत असल्याचे आढळले. त्यांनी काही महिन्यांपूर्वी विना पासपोर्ट वैध कागदपत्रांशिवाय भारतात प्रवेश केल्याचे कबूल केले. खांदेश्वर पोलिस ठाण्यात विदेशी व्यक्ती अधिनियम तसेच पारपत्र अधिनियमानुसार गुन्हा दाखल करून त्यांना अटक केली आहे.