डोंबिवली - आपण लग्न करू तू माझ्या सोबत ये अशी विचारणा त्याने तिला केली होती. तिने नकार देताच त्याने तिच्या गळ्यावर चाकूने वार केले. एकतर्फी प्रेमातून झालेल्या या हल्ल्यात सदर महिला गंभीर जखमी झाली होती.

तेव्हापासून टिळकनगर पोलीस ठाण्याचे पोलीस जिग्नेश जाधव या प्रेमीचा शोध घेत होते. नाशिक येथे तो लपून बसल्याची माहिती मिळताच पोलिसांनी नाशिक येथून त्याला अटक केली आहे.

वाशिंद येथे राहणारी 25 वर्षीय महिला ही डोंबिवली मध्ये आपल्या आईच्या घरी डोंबिवली मध्ये आली होती. यावेळी त्याच परिसरात राहणार तिचा मित्र जिग्नेश याने तिला भेटून माझ्यासोबत चल, आपण लग्न करू, तू मला आवडते असे सांगितले.

यावर सदर महिलेने लग्नास नकार दिला. याचा राग आल्याने जिग्नेश याने तिच्या गळ्यावर चाकूने वार करत तीला गंभीर जखमी केले होते. जखमी महिलेवर कळवा येथील रुग्णालयात उपचार सुरू आहेत. 14 एप्रिलला ही घटना घडली होती. याप्रकरणी टिककनगर पोलीस ठाण्यात तक्रार दाखल करण्यात आली होती. दाखल तक्रारीवरून पोलिसांनी गुन्हा दाखल करत जिग्नेश याचा शोध सुरू केला होता.

आरोपी जिग्नेश हा नाशिक येथे असल्याची गुप्त माहिती टिळकनगर पोलिसांना मिळाली होती. टिळकनगरचे वरिष्ठ पोलीस निरीक्षक अजय आफळे यांच्या मार्गदशनाखाली सहाय्यक पोलिस उपनिरीक्षक अजिंक्य धोंडे, श्याम सोनवणे,

अजित राजपूत संदीप सकपाळ, उमेश राठोड, रवींद्र बागल यांच्या पथकाने आरोपीला नाशिक येथून अटक केली. आरोपी जिग्नेश यांने गुन्ह्याची कबुली दिली आहे. कल्याण जिल्हा सत्र न्यायालयाने आरोपीला पोलीस कोठडी सुनावली असून गुन्ह्याचा पुढील तपास सहायक पोलिस निरीक्षक प्रविण बाकले करत आहेत.