डोंबिवली - कल्याण डोंबिवली परिसरात रिक्षांची संख्या भरमसाठ वाढली असल्याने चोरट्यांनी आता रिक्षांनाही आपले लक्ष करण्यास सुरुवात केली आहे. रिक्षा चोरुन त्यांची विक्री करणाऱ्या सराईत चोरट्यास टिळकनगर पोलिस ठाण्यातील गुन्हे शाखेच्या पथकाने अंबरनाथ येथून अटक केली आहे.

देवल उर्फ गणेश गायकवाड (वय 30) असे अटक आरोपीचे नाव आहे. त्याच्याकडून पोलिसांनी चार गुन्हे उघडकीस आणत 4 रिक्षा देखील हस्तगत केल्या आहेत.

शहरात रिक्षांची संख्या जास्त असल्याने चोरट्यांनी रिक्षा चोरी करण्याकडे लक्ष केंद्रीत केले आहे. कल्याण डोंबिवली परिसरात गेल्या काही महिन्यांत रिक्षा चोरीला जाण्याच्या गुन्ह्यांत वाढ होत आहे. गोरगरिबांचे हे उदरनिर्वाहाचे साधन असून अनेक चालक हे कर्ज काढून रिक्षा विकत घेऊन व्यवसाय करीत आहेत.

अशात रिक्षाच चोरीला गेल्यानंतर त्यांच्या उदरनिर्वाहाचा मार्ग बंद होत आहे. रिक्षा चोरीचे वाढते प्रमाण पाहता या गुन्ह्यांची उकल करण्याकरीता विशेष मोहीम राबविण्याची सुचना पोलिस आयुक्तालयाकडून सर्व पोलिस ठाण्यात देण्यात आल्या आहेत.

टिळकनगर पोलिस ठाण्याचे वरिष्ठ पोलीस निरीक्षक दत्तात्रय बोराटे यांनी तातडीने सहाय्यक पोलिस निरिक्षक जगन्नाथ शिंदे, सहाय्यक पोलिस उपनिरिक्षक श्याम सोनावणे यांच्या पथकाची नेमणूक केली.

परिसरातील सीसीटिव्ही फुटेज पोलिसांनी पाहिले असता एक व्यक्ती रिक्षा चोरी करत असल्याची बाब निदर्शनास आली. तांत्रिक तपास व गुप्त बातमीदार यांच्या मार्फत पोलिसांनी आरोपीची ओळख पटविली. अंबरनाथ येथील तो रहिवासी असल्याचे पोलिसांना समजले. पोलिसांनी तात्काळ आरोपी देवल याचा शोध घेत अंबरनाथ मधील भेंडीपाडा चाळ परिसरातून त्याला अटक केली.

देवलने गुन्ह्याची कबुली दिली असून त्याच्यावर टिळकनगर, कोळसेवाडी, मानपाडा व अंबरनाथ मधील शिवाजीनगर पोलिस ठाण्यात रिक्षा चोरीचे गुन्हे दाखल आहेत.

पोलिसांनी चार गुन्ह्यांची उकल करत 4 रिक्षा हस्तगत केल्या आहेत. देवल याने आणखी काही रिक्षा चोरी केल्या आहेत का ? त्यांची विक्री तो कोणाला करत होता ? आदि बाबींचा शोध पोलिस घेत आहेत.