डोंबिवली - संसदेतील अविश्वास प्रस्तावावर बोलताना शिवसेनेचे कल्याण लोकसभेचे खासदार डॉ. श्रीकांत शिंदे यांनी विरोधकांवर सडकून टिका केली. शिंदे यांनी हनुमान चालीसाचा मुद्दा उपस्थित करताच विरोधी बाकावरून आवाज आला तुम्हाला हनुमान चालीसा येते का. त्यालाही सडेतोड उत्तर देत खासदार शिंदे यांनी हनुमान चालीसाचे पठण केले.

शिवसेना व भाजपा खासदारांनी बाक वाजवत कौतुक केले असताना, डोंबिवली करांनी देखील खासदार शिंदे यांचे कौतुक बॅनर बाजी करत केले आहे. "हनुमान चालीसा लोकसभेत घुमली, शिवसेनेच्या डरकाळीने दिल्ली दुमदुमली" असा संदेश देत दमदार खासदार, हिंदुत्ववादी विचारांचे खरे वारसदार या शब्दांत शिंदे यांचे कौतुक शिवसैनिकांकडून करण्यात आले आहे.

पंतप्रधान नरेंद्र मोदी सरकारविरोधात काँग्रेसने मणिपूरचा प्रश्न पुढे करत अविश्वास प्रस्ताव आणला. या अविश्वास प्रस्तावावर बोलताना कल्याण लोकसभेचे खासदार डॉ. शिंदे यांनी महाराष्ट्रातील सत्ताकारणावर बोलताना विरोधकांवर टिका केली.

उद्धव ठाकरे यांच्यावर निशाणा साधताना शिंदे यांनी उद्धव ठाकरे बाळासाहेबांच्या विचारांपासून दूर गेले.

निवडणूक भाजपासह लढले आणि खुर्चीसाठी बाळासाहेबांचे विचार उद्धव ठाकरेंनी बाजूला ठेवले.” महाविकास आघाडीचं सरकार जेव्हा महाराष्ट्रात होतं तेव्हा बुलेट ट्रेन, मेट्रो, समृद्धी महामार्ग या प्रकल्पांमध्ये खोडा घालण्यात आला.

आरेमध्ये कारशेड होऊ दिलं नाही. त्यामुळे मेट्रोचा खर्च 10 हजार कोटींनी वाढला आहे. पायाभूत सुविधांची यांना आवश्यकताच वाटली नव्हती कारण ते घराच्या बाहेर पडत नव्हते.

“आम्ही बाळासाहेब ठाकरेंचे विचार पुढे घेऊन जात आहोत. उद्धव ठाकरे मुख्यमंत्री असताना महाराष्ट्रात हनुमान चालीसा म्हणणाऱ्यांना तुरुंगात डांबलं गेलं.” हे वाक्य जेव्हा श्रीकांत शिंदेंनी उच्चारलं तेव्हा विरोधी बाकांवरुन आवाज आला तुम्हाला हनुमान चालीसा म्हणता येते का?

त्यावर श्रीकांत शिंदे म्हणाले होय मला पूर्ण हनुमान चालीसा येते आणि त्यांनी मग लोकसभेत संपूर्ण हनुमान चालीसा म्हणून दाखवली. त्यावेळी शिवसेनेच्या आणि भाजपाच्या खासदारांनी बाक वाजवले आणि श्रीकांत शिंदे यांचं कौतुक केलं.

खासदार डॉ. शिंदे यांनी लोकसभेत म्हटलेल्या हनुमान चालीसा पठणची चर्चा राजकीय वर्तुळात चांगलीच रंगली असताना सर्व सामान्य नागरिक देखील त्यांचे कौतुक करत आहेत. शिंदे यांच्या हनुमान चालीसा पठणाचे व्हिडीओ सोशल मीडियावर चांगलेच व्हायरल होत आहेत.

असे असतानाच खासदार शिंदे यांचे कौतुक करणारे बॅनर डोंबिवली मध्ये झळकले आहेत. शिवसेना मध्यवर्ती शाखेच्या समोरील रस्त्यावर इंदिरा गांधी चौकात शिवसैनिकाकडून हे बॅनर लावण्यात आले आहेत.

श्रीकांत शिंदे यांच्या फोटोसह बॅनरबाजी करत "हनुमान चालीसा लोकसभेत घुमली शिवसेनेच्या डरकाळीने दिल्ली दुमदुमली" असे संदेश त्यावर देत

दमदार खासदार, हिंदुत्ववादी विचारांचे खरे वारसदार अशा शब्दांत शिंदे यांचे कौतुक करण्यात आले आहे. हे बॅनर सध्या डोंबिवली करांचे लक्ष वेधून घेत आहेत.