मुंबई : वानखेडे यांच्याबाबत वारंवार वक्तव्ये करून तुम्ही अप्रत्यक्षपणे त्यांची बदनामीच करीत आहात. याबाबत उच्च न्यायालयाने (Mumbai high court) दिलेले निर्देश पाळले नसतील, तर परिणाम भोगण्यास तयार राहा, असा इशारा उच्च न्यायालयाने आज मंत्री नवाब मलिक (Nawab Malik) यांना दिला. मलिक आणि वानखेडे यांच्यात सुरू असलेल्या वादासंदर्भात ज्ञानदेव वानखेडे यांनी ही याचिका सादर केली आहे.

त्यावर न्या. शारुख काथवाला व न्या. मिलिंद जाधव यांच्यासमोर सुनावणी झाली. बदनामीकारक विधाने न करण्याचे आदेश न्यायालयाने मलिक यांना दिले होते. तसे मलिक यांनी कबूलही केले होते, तरीही मलिक अजूनही वाटेल तशी विधाने करीत असल्याचा अर्जदारांचा दावा आहे. वारंवार वानखेडेंबाबत तुम्ही अशी वक्तव्ये का करीत आहात, त्यातून तुम्हाला काय मिळवायचे आहे, हे थांबले नाही तर यासंदर्भात तुम्हाला दिलेली सवलत काढून का घेऊ नये, असे प्रश्न खंडपीठाने विचारले.

अशी विधाने करून तुम्ही त्या व्यक्तीची बदनामीच करीत आहात, असेही खंडपीठाने मलिक यांना बजावले. मात्र आपण वानखेडेंबाबत करत असलेली विधाने ही हायकोर्टाच्या आदेशांच्या मर्यादेत राहूनच केलेली आहेत, असे मलिक यांच्यावतीने सांगण्यात आले. त्यामुळे ही बाब सिद्ध करा, अन्यथा परिणाम भोगण्यास तयार राहा, असा इशारा खंडपीठाने त्यांना दिला. याबाबत त्यांना शनिवारी प्रतिज्ञापत्र करण्यास सांगून खंडपीठाने सुनावणी सोमवारपर्यंत तहकूब केली.