मुंबई, ता. 17 : कोरोना विषाणूच्या प्रसाराची तीव्रता कमी होताच, कोरोना नियमांचे पालन करून 1 फेब्रुवारीपासून सर्वसामान्य प्रवाशांसाठी ठराविक वेळेत लोकल सेवा सुरू केली. त्यामुळे गर्दीची वेळ वगळून सर्वसामान्य प्रवासी प्रवास करू लागले. मात्र लोकलमधून लांबचा प्रवास करणारा प्रवासी गट लोकलमध्ये लुडो, सापशिडी खेळू लागले आहेत. तर, काही प्रवासी गट गाण्याच्या अंताक्षरी खेळू लागले आहेत. प्रवाशांमध्ये कोरोना गेल्याची मानसिकता वाढत असल्याने  मास्क लावण्याचा दिखावा करून लोकल प्रवास करत आहेत.  

मुख्यमंत्री उद्धव ठाकरे यांनी नागरिकांना मास्कचा वापर करून लोकल प्रवास करण्याचे आवाहन केले होते. राज्य सरकारकडून रेल्वे प्रशासनाला रेल्वे स्थानक आणि लोकलमध्ये गर्दी होणार नाही, असे नियोजन करण्याचे निर्देश दिले होते. कोरोना नियमांचे पालन करण्याबाबतची नियमावली दिली होती. मात्र, रेल्वेकडून गर्दीचे नियोजनाचे तीन-तेरा वाजले. यासह प्रवाशांनी कोरोना गेल्याची मानसिकता ठेवून प्रवासात सर्रासपणे एकमेकांना टाळी देणे, हात मिळविणे, एकमेकांचा मोबाईल वापरणे सुरू केले आहे. त्यामुळे पुन्हा कोरोनाचा प्रसार वाढण्याची शक्यता व्यक्त करण्यात येत आहे.

महत्त्वाची बातमी : अन्यथा पुन्हा इमारती सील केल्या जाणार, कोरोनाचा वाढता आलेख, महापालिका ऍक्शनमध्ये

मागील काही दिवसांत दररोजच्या रुग्णसंख्येत 300 ते 500 हून अधिक कोरोना रुग्णांची वाढ होत आहे. राज्य सरकारांने कोरोना नियम आणि वेळेची मर्यादा घालून सर्वसामान्य प्रवाशांना लोकल प्रवासात मुभा दिली. कोरोनाच्या नियमांची अंमलबजावणीची जबाबदारी रेल्वे आणि लोहमार्ग पोलिसांना देण्यात आली. मात्र या नियमांचे काटेकोरपणे पालन होताना दिसून येत नाही, अशी व्यथा प्रवासी संघटनेकडून मांडण्यात आली. 

मास्कचा दिखाऊपणा 

कोरोनाच्या पार्श्वभूमीवर विना मास्क लोकल प्रवासासाठी मुभा नाही. तरी,  अनेक रेल्वे स्थानकावरून विना मास्क लोकल प्रवास प्रवास करताना प्रवासी दिसत आहेत. विना मास्क प्रवास करणार्‍यांवर रेल्वे आणि महापालिका प्रशासनाकडून कारवाई करण्याचे निर्देश दिले आहे. त्यासाठी पाचशेपेक्षा जास्त पथक सुद्धा तयार करण्यात आहे. मात्र हे पथक फक्त महत्त्वाच्या रेल्वे स्थानकावरच दिसतात. इतर छोट्या-मोठ्या रेल्वे स्थानकावर हे पथक दिसून येत नाही. त्यामुळे इतर स्थानकातून प्रवासी विना मास्क प्रवास करताना दिसून येत आहे. तर, काही प्रवासी पथक पाहून मास्क घालतात. त्यानंतर स्थानकात प्रवेश करून पुन्हा मास्क काढून ठेवतात. त्यामुळे अशा दिखाऊपणामुळे त्यांच्यासह इतर नागरिकांच्या आरोग्याला धोका निर्माण होऊ शकतो. 

महत्त्वाची बातमी :  मुंबईत अकरावीच्या 97 हजार जागा रिक्त तरीही 36 हजार 358 विद्यार्थी प्रवेशापासून दूर

मध्य आणि पश्चिम रेल्वे मार्गावरील प्रवासी लोकलमध्ये बसल्यानंतर तोंडावरील मास्क काढून बसतात. त्यामुळे इतरही प्रवाशाना त्रास होतो. सहप्रवाशांनी मास्क लावण्यास  सांगितल्यास त्यांच्यामध्ये भांडणे सुद्धा होण्याचे प्रकार घडत आहे. त्यामुळे रेल्वे प्रशासनाने आणि राज्य सरकारकडून प्रत्येक डब्यात पोलिसांची नियुक्ती करण्यात यावी. जेणेकरून कोरोनाचे आखून दिलेल्या नियमांचे पालन होईल. यासह विना मास्क फिरणाऱ्या प्रवाशांबाबत तक्रार करण्यासाठी अँप किंवा हेल्पलाईन क्रमांक रेल्वे प्रशासनाने करणे आवश्यक असल्याची प्रतिक्रिया प्रवासी नितेश लाड यांनी दिली.

mumbai local news people are thinking corona has gone see the reality in train people are playing ludo