घाटकोपर ते वर्सोवा मेट्रोत तांत्रिक बिघाड झाल्याची माहिती समोर आली आहे. मागील ३० मिनीटांपासून ही मेट्रोसेवा बंद आहे. मुंबई मेट्रोने ट्वीट करत याबद्दल माहिती दिली आहे. तसेच सेवा सुरळीत करण्यासाठी युद्ध पातळीवर काम सुरू असल्याचे देखील सांगण्यात आले आहे.

तांत्रिक बिघाडामुळे सेवा सुरू होण्यास विलंब होत आहे. लवकरात लवकर सेवा पुन्हा सुरू करण्याचे प्रयत्न सुरू आहेत असे मुंबई मेट्रोकडून सांगण्यात आले आहे. नागरिकांची कामावरून सुटण्याची वेळ झाल्याने याचा थेट फटका बसणार आहे.

ऑफिस सुटण्याची वेळ असल्याने मेट्रो स्थानकांवर प्रवाशांची गर्दी झाल्याचे दिसून येत आहे. मेट्रोकडून नेमकं काय बिघाड आहे याबद्दल खुलासा करण्यात आलेला नाहीये. तसेच पुढच्या किती वेळात मेट्रो सेवा सुरू होईल याबद्दल देखील माहिती देण्यात येत नाहीये. अर्धा किंवा एक तासात मेट्रो सेवा सुरळीत होईल असे वरवरचे उत्तर दिले जात असल्याचे सांगितलं जात आहे. दरम्यान या बिघाडामुळे नागरिकांची मात्र मोठ्या प्रमाणात गैरसोय होत आहे.