मुंबई : पत्नी कामावर गेली असताना 16 वर्षीय मुलीवर लैंगिक अत्याचार करण्याचा प्रयत्न करणाऱ्या 50 वर्षीय पित्याला मालाड पोलिसांनी सोमवारी मध्यरात्री अटक केली. याप्रकरणी पत्नीच्या तक्रारीवरून पोलिसांनी विनयभंग व बालकांचे लैंगिक अत्याचारापासून संरक्षण कायद्याअंतर्गत गुन्हा दाखल केला होता. मुलीने विरोध केला असता आरोपी पित्याने पीडित मुलीसह तिच्या बहिणीलाही मारहाण केल्याची माहिती मिळत आहे.

या प्रकरणी तक्रारदार मुलीची आई नोकरी करत असून. त्यांचे पती नोकरी अथवा व्यवसाय करीत नसल्यामुळे घऱीच असतात. नोकरी करत असल्यामुळे मुलीची आई दिवसभर कार्यालयात व्यस्त असते.याचाच फायदा आरोपीने उचलला. यावर्षी फेब्रुवारीमध्ये तक्रारदार महिलेच्या 16 व 14 वर्षांच्या मुली घरी एकट्याच होत्या. त्यावेळी आरोपीने घराचा दरवाजा बंद करून 16 वर्षीय मुलीचा विनयभंग केला, तसेच तिच्यावर जबरदस्ती करण्याचा प्रयत्न केला.

त्याला विरोध केला असता आरोपीने दोन्ही मुलींना मारहाण केली. पण पित्याच्या भीतीने हा प्रकार पीडित मुलीने आईला सांगितला नाही. अखेर धाडस करून पीडित मुलीने नुकताच आईला हा प्रकार सांगितल्यानंतर तिने याप्रकरणी मालाड पोलिसांकडे तक्रार केली. पोलिसांनी सोमवारी रात्री विनयभंग व बालकांचे लैंगिक अत्याचारापासून संरक्षण कायद्याअंतर्गत गुन्हा दाखल केला. त्यानंतर आरोपी पित्याला राहत्या घरातून सोमवारी मध्यरात्री अटक केली.