पोलीस भरती तसंच आपल्या हक्कांच्या मागणीसाठी आज तृतीयपंथीयांनी मंत्रालयावर धडक मोर्चा काढला. मुख्यमंत्री एकनाथ शिंदे यांची भेटही होणार होती. मात्र मुख्यमंत्र्यांनी वेळ न दिल्याने तृतीयपंथीयांनी आक्रमक पवित्रा घेतला आहे. मात्र पोलीस संकटात सापडले आहेत.

तृतीयपंथी नागरिक आज मुख्यमंत्री एकनाथ शिंदे यांची मंत्रालयात भेट घेणार होते. मात्र मुख्यमंत्री सह्याद्री अतिथी गृहामध्ये बैठका करत असल्याने त्यांनी वेळ दिली नाही. त्यामुळे तृतीयपंथीयांनी गोंधळ केला. पोलिसांनी त्यांना अडवण्याचा प्रयत्नही केला.

परंतु, आपल्याला ताब्यात घेण्यासाठी महिला किंवा पुरुष नाही तर तृतीयपंथी पोलीस आणा, अशी मागणी तृतीयपंथीयांनी केली. त्यामुळे आता पोलिसांसमोर पेच उभा राहिला आहे.

काय आहेत तृतीयपंथीयांच्या मागण्या?

• तृतीयपंथीयांना पोलीस भरतीमध्ये विशेष भरती म्हणून सामावून घ्यावे

• तृतीयपंथीयांना शैक्षणिक आरक्षण द्यावे

• अनुदानित संस्था व शासकीय नोकऱ्यांमध्ये सामावून घ्यावे.

यासह आणखी काही मागण्या आणि हक्कांसाठी त्यांनी मंत्रालयावर धडक मोर्चा काढला होता. याबद्दल त्यांनी मुख्यमंत्र्यांना भेटण्याची मागणीही केली होती. मात्र ही मागणी मान्य न झाल्याने त्यांनी आक्रमक पवित्रा घेतला. मंत्रालयासमोर भीक मागून त्यांनी या प्रकाराचा निषेध केला आहे.