मुंबई : जंबो कोविड सेंटर घोटाळा प्रकरणी ईडीने मुंबई परिसरात बुधवारी आठ ठिकाणी छापेमारी केली.जंबो कोविड सेंटरशी संबंधित कंत्राटदारांच्या कार्यालयांवर निवासस्थानांवर छापे टाकण्यात आल्याची माहिती मिळत आहे. मुंबई उपनगरातील विलेपार्ले येथील एका बांधकाम व्यावसायिकाच्या कार्यालयावर आणि इतर मालमत्तांवरही छापे टाकण्यात आले आहे.

या व्यावसायिकाला जंबो कोविड सेंटरचे एक कंत्राट मिळाले होते.यापूर्वी, ईडीने या प्रकरणात 15 मालमत्तांची झडती घेतली होती. ज्यात शिवसेना ठाकरे गटाचे नेते संजय राऊत यांचे निकटवर्तीय सुजित पक्तर, आदित्य ठाकरे यांचे निकटवर्तीय असलेले पक्षाचे पदाधिकारी सूरज चव्हाण आणि आयएएस अधिकारी संजीव जयस्वाल यांचा समावेश आहे.

लाइफलाइन हॉस्पिटल मॅनेजमेंट सर्व्हिसेस आणि बीएमसीने महामारीच्या काळात जारी केलेल्या विविध निविदांविरुद्धच्या प्रकरणाची चौकशी करताना, ईडीने बीएमसी आयुक्तांना पत्र लिहून निविदा प्रक्रियेची माहिती मागवली होती.

यापूर्वीची कारवाई

कथित जंबो कोव्हिड सेंटर घोटाळ्याप्रकरणी ईडीने कारवाईचा बुधवारी 21 जूनला मुंबई शहरात ईडीने तब्बल 15 ठिकाणी छापे टाकले. मुंबई महापालिकेचे तत्कालीन अतिरिक्त आयुक्त संजीव जयस्वाल यांच्या घरीही ईडीच्या छापेमारी करण्यात आली शिवसेना उद्धव बाळासाहेब ठाकरे या पक्षाचे प्रमुख आणि राज्याचे माजी मुख्यमंत्री उद्धव ठाकरे यांच्या कुटुंबियांच्या जवळचे असलेले सुजित पाटकर यांच्याही घरी ईडीचे पथक धडकले होते. लाइफलाइन रुग्णालयाशी संबंधित ठिकाणांवर ईडीकडून छापे टाकण्यात आले.पाटकर यांच्यासह ठाकरे गटाचे आणखी एक पदाधिकारी सूरज चव्हाण यांच्याशी संबंधित ठिकाणीही ईडीने छापे टाकले.