Mumbai - गेल्या अनेक दिवसांपासून उन्हाने हैराण झालेल्या नागरिकांना दोन दिवसंपासून काहीसा दिलासा मिळत आहे. वातावरण काहीसे ढगाळ असतानाच रविवारी दुपारी कल्याण ग्रामीण, भिवंडी, अंबरनाथ, बदलापूर परिसरात धुळीचे वादळ सदृश्य परिस्थिती निर्माण झाली आहे. हवेमध्ये प्रचंड धुळीचे कण असून रस्त्यावर चालताना नागरिकांना, वाहन चालकांना याचा त्रास होत आहे. मकरच महिन्यात असेच धुळीचे वादळ आले होते.

राज्यात विविध भागात ढगाळ वातावरण तसेच अवकाळी पावसाचा अंदाज हवामान खात्यातर्फे वर्तवण्यात आला होता. उकाड्याने हैराण झालेले नागरिक पावसाची आतुरतेने वाट पहात आहेत. त्यातच दोन दिवसांपासून वातावरणातील उकाडा काहीसा कमी झाला असल्याने दिलासा मिळाला आहे. मात्र घामाच्या धारांनी नागरिक न्हाऊन निघत असतानाच रविवारी सुटलेल्या वाऱ्याने सारेच काहीसे सुखावले आहे.

कल्याण, डोंबिवली, अंबरनाथ, बदलापूर आणि आसपासच्या ग्रामीण परिसरात रविवारी सकाळ पासूनच ढगाळ वातावरण होते. त्यातच दुपारी 2 वाजण्याच्या सुमारास अचानक सुटलेल्या सोसाट्याच्या वाऱ्यांमुळे ठाणे जिल्हातील शहर आणि ग्रामीण परिसरात काही काळ धुळीच्या चादरी आड झाकोळली गेली होती. दरम्यान असेच धुळीचे वादळ मार्च महिन्यात सुद्धा आले होते.

जोरदार वाऱ्यांमुळे ठाणे जिल्ह्यातील शहरामध्ये रस्त्यांवर, इमारतींवर, झाडांवर साचलेली धूळ मोठ्या प्रमाणात हवेत उडाल्याने काही काळ दृश्य मानता कमी झाली होती. इतक्या मोठ्या प्रमाणावर हे धुळीचे लोट उठले होते. दरम्यान, शहरावर पसरलेल्या या धुळीमुळे शहरातील हवेची गुणवत्ता ही मोठ्या प्रमाणात खालावल्याचे बोलले जात आहे. परिणामी श्वसन आजार असणाऱ्या नागरिकांना त्याचा मोठा त्रास झाला.