Mumbai Pollution: मुंबईत स्वच्छता मोहिम सुरू आहे. या अभियानाला व्यापक स्वरूप येत आहे. आता केंद्र सरकारच्या पर्यावरण मंत्रालयाकडून पंधराव्या वित्त आयोगांतर्गत पालिकेला ६२० कोटी अनुदान मिळाले आहे. त्यामुळे या अभियानाला आणि मुंबईच्या हवेची गुणवत्ता सुधारण्याला वेग येणार आहे. केंद्र सरकारच्या निधीतून साफसफाईसाठी लागणा-या मशीन आणि यंत्रसामुग्री खरेदी केली जाणार असल्याची माहिती पालिका प्रशासनाने दिली.

मुंबईत बांधकामे वाढत आहेत. त्यामुळे मोठ्या प्रमाणात प्रदुषणही वाढत आहे. पालिकेने प्रदुषण रोखण्यासाठी मार्गदर्शक तत्वे लागू केली आहे. ज्या बांधकामाच्या ठिकाणी प्रदुषणाचे नियम पाळले जात नाहीत अशा बांधकामांना नोटीसा पाठविणे आणि बांधकामे थांबविणे, दंड आकारणे अशी कारवाई पालिकेने सुरू केली आहे.

बांधकामाच्या ठिकाणी ३५ फूट उंच भिंत बांधणे सीसीटीव्ही बसवणे, धुळीचे कण पसरू नये यासाठी पडदे लावणे, पाण्याची फवारणी करणे, स्प्रिंकलर बसवणे अशा २७ प्रकारची नियमावली पालिकेने जारी केली आहे. पालिकेच्या महास्वच्छता अभियानांतर्गत ही कारवाई सुरू आहे. स्वच्छता अभियानाला वेग यावा आणि प्रदुषण रोखण्यास मदत व्हावी यासाठी केंद्र सरकारने पुढाकार घेतला असून केंद्राच्या वित्त आयोगाने ६२० कोटी रुपयाचे पालिकेला अनुदान दिल्याची माहिती पालिकेने दिली.