Mumbai Theft : ज्वेलर्सच्या दुकानात चोरी करण्यासाठी त्यांनी त्याच लाईन मध्ये असलेले एक दुकान भाड्याने घेतले. त्या दुकानात मोबाईल शॉप सुरु केले. प्लॅन नुसार शुक्रवारी मध्यरात्री दोन दुकानांना भगदाड पाडून त्यांनी ज्वेलर्सच्या दुकानात प्रवेश केला. शोकेस मधील दागिने त्यांनी चोरल्यानंतर त्यांनी आपला मोर्चा मुख्य लॉकर कडे वळविला.

गॅस कटरने लॉकर तोडत असताना गॅस बंद झाला नी त्यांचा चोरीचा प्रयत्न असफल झाला. केवळ शोकेसमधील दागिन्यांवर त्यांनी शेवटी समाधान मानत तेथून पसार झाले. याप्रकरणी खडकपाडा पोलिस ठाण्यात गुन्हा नोंद करण्यात आला असून पोलिस तपास करत आहेत.

कल्याण पश्चिमेतील बिर्ला कॉलेज रोड परिसरातील महालक्ष्मी ज्वेलर्सचे दुकान शुक्रवारी मध्यरात्री चोरट्यांनी फोडून त्यातील शोकेस मधील सोन्या चांदिचे दागिने लंपास केले आहेत. शनिवारी सकाळी दुकानाचे मालक अशोक मोहिते जेव्हा दुकानात आले. तेव्हा त्यांना दुकानातील साहित्य अस्ताव्यस्त असल्याचे आढळून आले.

दुकानाच्या आत जाऊन त्यांनी पाहिले असता त्यांना गॅस कटर आणि सिलेंडर, तसेच दुकानाच्या भिंतीला मोठे भगदाड पडल्याचे दिसून आले. त्यांनी दुकाना तील लॉकर तपासला असता मुख्य लोकर चोरटे फोडू शकले नव्हते दुकानाच्या शोकेस मधील दागिने मात्र घेऊन त्यांनी पळ काढला होता याप्रकरणी दुकान मालकांनी त्वरीत खडकपाडा पोलिसांना याची माहिती दिली. दुकानातील सीसीटीव्ही ची वायर चोरट्यांनी काढून टाकली होती.

मोहीते यांंनी पाहिले असता शेजारच्या दोन दुकानांच्या भिंतींना भगदाड पाडून चोरटे ज्वेलर्सच्या दुकानात शिरले होते. त्यांच्या दुकानांच्या रांगेतील दोन दुकाने सोडून तरुणांनी काही दिवसांपूर्वीच मोबाईल शॉप तेथे सुरु केले होते. त्यासाठी त्यांनी तो गाळा भाड्याने घेतला होते. हे दुकान शनिवारी उघडले गेले नाही,

तसेच ते तरुण देखील गायब आहेत. त्यामुळे याच तरुणांनी ही चोरी केली असल्याचा संशय व्यक्त केला जात आहे. जो गाळा या तरुणांनी घेतला होता, त्या गाळ्याच्या भिंतीला ही भगदाड पाडलेले आहे.

सीसीटिव्ही ची वायर काढण्याआधीचे सीसीटिव्ही फुटेज पोलिसांच्या हाती लागले असून त्याआधारे चोरट्यांचा शोध घेतला जात आहे.

हे चोरटे नेपाळचे असल्याची प्राथमिक माहिती पोलिस सुत्रांनी दिली आहे. या घटनेमुळे कल्याण परिसरात एकच खळबळ उडाली असून दुकान, घर भाड्याने देताना अजून ही निष्काळजीपणा केला जात असल्याचे यामुळे स्पष्ट होत आहे.