डोंबिवली - डोंबिवली एमआयडीसीतील एका बंद कंपनीच्या सुरक्षारक्षकाची हत्या झाल्याची घटना घडली आहे. ज्ञान बहादुर मुरूम असे मयत सुरक्षा रक्षकाचे नाव असून याप्रकरणी मानपाडा पोलीस ठाण्यात गुन्हा नोंद करण्यात आला असून पोलीस अधिक तपास करीत आहेत.

डोंबिवली एमआयडीसी फेज वन मधील विजय पेपर मिलचे सुरक्षा रक्षक ज्ञान मुरूम यांची हत्या झाल्याची घटना बुधवारी सकाळी उघडकीस आली. मानपाडा पोलिसांना याची माहिती मिळताच पोलिसांनी घटनास्थळी दाखल होत तपास सुरू केला. कंपनी अनेक वर्ष बंद होती. त्यामुळे कंपनीतील भंगाराचे सामान चोरीच्या उद्देशाने चोरटे कंपनीत घुसले असावे आणि त्या चोरांनी सुरक्षा रक्षकाची हत्या केली असावी असा प्राथमिक अंदाज पोलिसांनी वर्तविला आहे. डोंबिवलीत दोन दिवसांपूर्वीच दारूच्या नशेत झालेल्या वादातून एका व्यक्तीची हत्या झाल्याची घटना घडली होती. त्यानंतर तिसऱ्याच दिवशी ही दुसरी हत्येची घटना उघडकीस आली आहे.