नवी मुंबई : अमली पदार्थ विरोधी पथकातील (NCB) आणखी दोघा पोलिस कर्मचाऱ्यांनी पान मसाला विक्रेत्याकडे गुटखा आणि पान मसाल्याचा धंदा सुरू ठेवण्यासाठी दरमहा १५ हजार रुपये लाचेची मागणी (Bribe crime) केल्याचे उघडकीस आले आहे. त्यामुळे एसीबीने (ACB) या दोन पोलिस कर्मचाऱ्यांविरोधात गुन्हा दाखल (police FIR) केला.

या कारवाईत गुन्हा दाखल करण्यात आलेल्यांमध्ये पोलिस शिपाई बाबासाब मधु सांगोलकर व पोलिस हवालदार इक्बाल बशिर शेख या दोघांचा समावेश असून हे दोघेही नवी मुंबई पोलिसांच्या अमली पदार्थ विरोधी पथकात कार्यरत आहेत. या प्रकरणातील तक्रारदार मोहम्मद फैज निजामुद्दीन सय्यद हा सीवूड्स मध्ये राहाण्यास असून त्याचा पान मसाला व गुटखा विक्रीचा व्यवसाय आहे.

अमली पदार्थ विरोधी पथकाला याबाबतची माहिती मिळाल्यानंतर या पथकातील पोलिस कर्मचारी सांगोलकर आणि शेख या दोघांनी मोहम्मद फैज याला पान मसाल्याचा व्यवसाय पुढे सुरू ठेवण्यासाठी वरिष्ठ अधिकाऱ्याला दरमहा १५ हजार रुपये द्यावे लागतील, असे सांगितले होते. त्यामुळे मोहम्मद फैज याने लाच प्रतिबंधक विभागाकडे तक्रार दाखल केली होती.