नवी मुंबई : पर्यावरणाचा समतोल राखण्यात वृक्षांचा मोठा वाटा असल्याचे महत्त्व पटल्याने आपणही पर्यावरण रक्षणासाठी खारीचा वाटा द्यावा, या हेतूने झपाटलेल्या एका रिक्षाचालकाने चक्क आपल्या रिक्षातच कुंड्यांमध्ये वृक्षलागवड केली आहे. या छोट्याशा कृतीमुळे प्रभावित झालेल्या जवळपास हजारभर प्रवाशांनी स्वतःच्या घरातदेखील वृक्ष लागवड केली असल्याची माहिती उमर खान या रिक्षाचालकाने दिली आहे.

ही बातमी वाचली का? भाजी विक्रेत्यांनी घेतलीये मुंबईकरांची सुपारी...

नवी मुंबई येथील नेरूळ परिसरातील करावे गावात राहणाऱ्या उमर खान या रिक्षाचालकाला पर्यावरण रक्षणाच्या ध्यासाने झपाटले आहे. सध्याच्या प्रदूषणकारी युगात नागरिकांच्या आरोग्यास हानी पोहचत आहे. जवळपास पाच वर्षांपासून नवी मुबंई परिसरात रिक्षा व्यवसाय करत असून मध्य प्रदेशातून नवी मुबंईत पोटापाण्यासाठी आल्याचे त्यांनी सांगितले. तसेच मुंबईत आल्यानंतर पर्यावरण रक्षणासाठी काही तरी योगदान देणे आवश्‍यक असल्याचे लक्षात आले; मात्र संसाराच्या रहाटगाड्यात काही करणे शक्‍य होत नसल्याने रिक्षातच वृक्षलागवड करण्याचा निर्णय घेतला असल्याचेही त्यांनी सांगितले. 

ही बातमी वाचली का? ...म्हणून त्या महिलेला कपडे बदलताना बाहेर काढले

उमर खान यांनी दिलेल्या माहितीनुसार रिक्षाचालक आणि प्रवासी यांच्यात अनेकदा भाड्याच्या रकमेवरून खटके उडताना दिसतात; मात्र आपण करत असलेल्या या कामामुळे अनेक प्रवासी रिक्षेतून प्रवास केल्यानंतर वादविवाद करण्याऐवजी ज्यादा भाडे देऊन जात असल्याने आपल्या उत्पन्नातदेखील वाढ होत असल्याचे सांगतात. उमर यांनी रिक्षात लागवड केलेल्या काही वृक्षांना आता फळे लागली असून, रिक्षेतील छोटेखानी लिंबाचे वृक्ष लिंबानी बहरले असल्याचे पाहून प्रवासीदेखील आनंद व्यक्त करत आहेत. 

२२ हजार रुपये खर्च
११ महिन्यांपूर्वी विकत घेतलेल्या रिक्षातच वृक्षलागवड करण्याची संकल्पना उमर यांना सुचिली. या संकल्पनेनुसार रिक्षामध्ये विविध प्रकारच्या ९ वृक्षांची कुंडीत लागवड केली आहे. रिक्षेच्या छतावर कृत्रिम गवत लावून रिक्षेला छोट्याशा उद्यानाचे स्वरूप देण्यासाठी उमर यांना जवळपास २२ हजारांपेक्षा जास्त खर्च आला.