मुख्यमंत्री उद्धव ठाकरे यांनी शुक्रवारी राज्यातील जनतेला लॉकडाउनचा इशारा दिला. मी लॉकडाउन लावत नाही पण संपूर्ण लॉकडाउनचा इशारा देतोय असं ते म्हणाले. विविध क्षेत्रातील लोकांशी संवाद साधून आणि चर्चा करून मगच लॉकडाउनचा निर्णय घेतला जाईल असंही त्यांनी सांगितलं. त्याचसोबत शनिवारी झालेल्या बैठकीनंतर, 'हे बंद करा, ते बंद करा ही आपली भूमिका नाही पण आता जिंदगी, जान, उसके बाद काम' या पद्धतीने जावे लागेल', असेही ते म्हणाले. त्यामुळे रविवारी झालेल्या कॅबिनेट बैठकीत लॉकडाउनचा निर्णय घेतला जाणार हे जवळपास निश्चित होतं. पण लोकभावनेचा विचार करता अखेर संपूर्ण लॉकडाउन न लावता कठोर निर्बंध लावण्यावर शिक्कामोर्तब करण्यात आले.

"सरकारने केलेले नियम पाळायचेच नसतील तर..."

मुंबईचे पालकमंत्री असलम शेख यांनी मिनी लॉकडाउनबद्दल माहिती दिली. त्यातील ठळक मुद्दे-

- राज्य मंत्रिमंडळाच्या बैठकीत कोरोनाला रोखण्यासाठी कठोर निर्बंध लादण्याच्या निर्णयावर शिक्कामोर्तब
- दररोज रात्री ८ ते सकाळी ७ या कालावधीत नाईट कर्फ्यू. केवळ अत्यावश्यक सेवा पुरवणाऱ्या कर्मचाऱ्यांनाच प्रवासाची मुभा
- कठोर निर्बंधांची अंमलबजावणी उद्या रात्री आठ वाजल्यापासून
- सार्वजनिक वाहतूक सुरू पण त्यातही निर्बंध लागू
- बसेस, टॅक्सी, रिक्षा, ट्रेन या सुविधा सुरू राहतील. ट्रेन, बसमध्ये केवळ आसनक्षमतेनुसार प्रवास; उभ्याने प्रवासास परवानगी नाही
- रात्रीच्या वेळी टॅक्सी किंवा रिक्षातून अत्यावशक सेवा पुरवणाऱ्यांना प्रवासास मुभा
- राज्यात शुक्रवार रात्र ते सोमवार सकाळ 'वीकेंड लॉकडाउन'. तर इतर दिवशी नाईट कर्फ्यू
- दुकानदार आणि हॉटेल व्यावसायिकांना केवळ पार्सल सेवा सुरू ठेवण्यास मुभा
- शक्य त्या ऑफिसेसमध्ये वर्क फ्रॉम होम सुविधा वापरण्यावर भर
- धार्मिक स्थळांवरील निर्बंध कठोर केले असून केवळ ठराविक व्यक्तींच्या उपस्थितीतच धार्मिक स्थळे सुरू
- सिनेमागृह, नाट्यगृहे पूर्णपणे बंद राहणार
- मैदाने, प्ले-ग्राउंड्स पूर्ण बंद
- मॉल सुरू करण्यासाठी लसीकरण सक्तीचे
- कोणत्याही चित्रपटाच्या किंवा सिरियलच्या मोठ्या प्रमाणावरील शूटिंगला बंदी
- जिल्हाबंदी नाही
- फक्त लसीकरण सुरू राहणार आहे.