कल्याण : पावसाळा तोंडावर आला असल्याने नालेसफाईच्या कामाला सुरुवात झाली असून, पालिकेने ही कामे करण्यासाठी खासगी ठेकेदारांची नेमणूक केली आहे. मात्र हे ठेकेदार कामगारांना अत्यावश्यक असलेले हातमोजे,  बूट,  मास्क आदि साहित्य न पुरवता काम करुन घेत असल्याचे समोर आले असून एकीकडे कोरोनाचे संकट असताना देखील सुरक्षा कवच न देता या कामगारांना कामाला लावल्याने त्यांचे आरोग्य धोक्यात आले आहे.

हे ही वाचा : आम्ही 'पॅकेज'च्या जाहिराती करत नाही; आम्ही कामं करतोय : मुख्यमंत्र्यांची विरोधकांवर घणाघाती टीका

सध्या लॉकडाऊन मधील चौथा टप्पा सुरू असताना देखील पावसाळ्यात नागरिकांना त्रास होऊ नये म्हणून पालिकेने खासगी ठेकेदारांची नेमणूक करून कल्याण पूर्व सहित पालिका हद्दीत नालेसफाईला सुरुवात केली आहे. एकीकडे कोरोना बाधित रुग्णाची संख्या वाढत असून दुसरीकडे नाले सफाई करणारे कामगार गटार नाल्यात उतरून कोणत्याही सुविधांविना गाळ आणि कचरा काढत असल्याचे भयानक चित्र समोर आले आहे. विशेष म्हणजे त्यांना हे काम विनामोजे हाताने करावे लागत असून त्यांना कोणतेही सुरक्षाकवच देखील ठेकेदाराकडून देण्यात आलेले नाही.

नक्की वाचा : मुलांनो तयारीला लागा! 'या' दिवसापासून शाळा सुरु होण्याची शक्यता

भाजपकडून आयुक्तांकडे तक्रार 
कोट्यवधी रुपयांचा फायदा खिशात घालणाऱ्या ठेकेदाराकडून कामगारांना सुरक्षेची कोणतीही साधने अथवा सुरक्षा कवच देखील पुरवले जात नसल्याचा आरोप भाजपा कल्याण पूर्व मंडल अध्यक्ष आणि परिवहन सदस्य संजय मोरे यांनी केला आहे. दरम्यान पालिका आयुक्त डॉ. विजय सूर्यवंशी यांनी लक्ष्य देऊन कामगारांना सुरक्षा कवच द्यावे अन्यथा ठेकेदारांची बिले रोखावी अशी मागणी मोरे यांनी केली आहे.

No masks, no gloves; Endangering the health of sanitation workers