मुंबई: मुंबईत आज पोलीस (Police) अधिकाऱ्यांची महत्त्वाची बैठक होणार आहे. त्या संदर्भात राज्याचे गृहमंत्री दिलीप वळसे-पाटील (dilip walse patil)यांनी माहिती दिली आहे. "राज्यामध्ये वाढणारी गुन्हेगारी, महिलांवर होणारे अत्याचार या संदर्भात निर्णय घेण्याच्या दृष्टीकोनातून सगळे पोलीस अधीक्षक, आयुक्तांना बोलावले आहे. दुपारी दोनला बैठक सुरु होईल. पाच वाजेपर्यंत चालेल परिस्थितीचा आढावा घेऊन नवीन सूचना देण्यात येतील" अशी माहिती दिलीप वळसे-पाटील यांनी दिली.

गडचिरोलीत एका कार्यक्रमात राज्यपाल भगतसिंह कोश्यारी आणि रश्मी शुक्ला एका मंचावर उपस्थित होते. त्या संदर्भात विचारलेल्या प्रश्नावर माहिती नसल्याचे गृहमंत्र्यांनी सांगितले. समीर वानखेडेंनी त्यांच्यावर पाळत ठेवण्यात येत असल्याची तक्रार केली आहे. त्या बद्दल विचारलेल्या प्रश्नावर वळसे-पाटील म्हणाले की, "मला काही तसं वाटत नाही. समीर वानखेडेंवर पोलिसांच वॉच नाहीय. तशा सूचना दिलेल्या नाहीत"

सुबोध जैस्वाल यांना पाठवलेल्या समन्सबद्दलच्या प्रश्नालाही गृहमंत्र्यांनी उत्तर दिले. "सीबीआय डायरेक्टर म्हणून समनस बजावलेले नाही. साक्षीदार म्हणून ते समन्स बजावलं आहे. रश्मी शुक्ला प्रकरणात चौकशी सुरु आहे. त्यावेळी ते डीजी होते" असे वळसे-पाटील यांनी सांगितले.