मुंबई माजी पोलीस आयुक्त परमबीर सिंह यांनी गृहमंत्री अनिल देशमुख यांच्यात सध्या एक संघर्ष पाहायला मिळतो आहे. वादग्रस्त पोलीस अधिकारी सचिन वाझेला बार आणि इतर आस्थापनांकडून दरमहा १०० कोटीची वसूली करण्याचे आदेश गृहमंत्र्यांनी दिले असल्याचा आरोप परमबीर सिंह यांनी केला. याच दरम्यान, कमिशनर ऑफ इंटेलिजन्स असताना रश्मी शुक्ला यांनी पोलीस दलातील अधिकाऱ्यांच्या भ्रष्टाचाराचा मांडलेला मुद्दा पुन्हा नव्याने चर्चेत आला. या प्रकरणात रश्मी शुक्ला यांनी काही लोकांचे फोन टॅपिंग करून भ्रष्टाचाराचा आरोप केला. मात्र शुक्ला यांनी केलेलं फोन टॅपिंग बेकायदेशीर असल्याचं सांगत राष्ट्रवादीचे नेते जितेंद्र आव्हाड यांनी रश्मी शुक्ला यांना इशारा दिला.
रश्मी शुक्लांनी केलेल्या फोन टॅपिंग प्रकरणावर जितेंद्र आव्हाड यांनी पत्रकारांशी संवाद साधला. यावेळी त्यांनी रश्मी शुक्ला यांच्या कृत्याबद्दल त्यांच्यावर टीका केली आणि त्यांना इशाराही दिला. "अहवाल नीट वाचल्यावर कळतं की यात फक्त फोन चोरून ऐकण्याची विकृत मानसिकता, पराकोटीचा प्रांतवाद, आणि जात्यांधपणा आहे. भ्रष्टाचाराचा कणभरही पुरावा नाही. हा थिल्लरपणा धोकादायक आहे. आम्ही कारवाईची मागणी करणारच आहोत. कारण एक भगिनी म्हणून आम्ही सोडून द्यायचं व माफी द्यायची आणि त्यांनी पाठीत सुरा खुपसायचा, हा प्रकार बरोबर नाही. त्यामुळे आता माफी बंद. आता फक्त कारवाई व्हायला हवी", असा इशारा त्यांनी दिला.
रश्मी शुक्ला यांनी केलेल्या गोष्टी चुकीच्या आहेत. कोणाच्या सांगण्यावरून हे षडयंत्र रचलं गेलं? बदल्यांच्या नावाने हे रॅकेट कसं चालवलं गेलं? दोन महिन्यांपूर्वी मी त्यांच्याशी संपर्क साधण्याचा प्रयत्न केला होता. तेव्हा रश्मी शुक्ला यांनी मला, 'तुम्ही माझ्याशी WhatsApp वर बोलू नका. लँडलाईन फोनवर कॉल करून बोला', असं सांगितलं होतं. एक अधिकारी एका मंत्र्यांना असं सांगतो याबद्दल आव्हाडांनी नाराजी व्यक्त केली.
आज कॅबिनेटमध्ये या प्रकरणावर चर्चा झाली आणि त्यावर संतप्त प्रतिक्रिया व्यक्त झाल्या. रश्मी शुक्ला आणि जैस्वाल यांचं पत्र म्हणजे उंदराला मांजर साक्ष असंच आहे. फोन टॅपिंगचे पेन ड्राईव्ह हे अधिकारी कोणत्या हक्काने वाटत आहेत. या प्रकरणात राजकीय हात आहे की नाही नंतर शोधू, पण सर्वप्रथम यामागे डोकं कोणाचं ते आम्ही शोधत आहोत, अशी माहितीही त्यांनी दिली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.