रोहा : लांबलेला पावसाळा आणि वादळी वातावरणामुळे रायगड जिल्ह्यातील शेती आणि बागांचे उत्पादन घटले आहे. दुसरीकडे याच वातावरणामुळे किटकांची अधिक पैदास झाल्याने माशीमार स्थलांतरित पक्ष्यांची संख्या वाढली असल्याचे निरीक्षण पक्षीतज्ज्ञांनी नोंदवले आहे. 

दरवर्षी सप्टेंबरअखेर पावसाला पूर्णविराम मिळून हिवाळा सुरू होतो. त्यामुळे पुढील महिन्यापासून रायगड जिल्ह्यात स्थलांतरित पक्ष्यांचे आगमन होते. यंदा पावसाळा नोव्हेंबरपर्यंत लांबला. त्याचा परिणाम या पक्ष्यांच्या आगमनावर झाला. परंतु या वातावरणात किटकांची संख्या वाढल्याने या मेजवानीसाठी माशीमार पक्ष्यांची संख्या वाढली आहे. याबाबतचीा नोंद अनेक पक्षीनिरिक्षकांनी घेतली आहे. 

धक्कादायक : नवी मुंबईत मिरची लिंबूचा खेळ

दरवर्षी हिवाळ्यात रायगड जिल्ह्यात 100 पेक्षा अधिक स्थलांतरित पक्ष्यांच्या प्रजातींचे दर्शन होते. या वर्षी पाऊस चांगला झाल्याने स्थलांतरित पक्ष्यांची संख्या कमी दिसत असली, तरी माशीमार प्रजातीच्या पक्ष्यांची संख्या अधिक असल्याचे पक्षीनिरिक्षक सांगतात. 

हे वाचा : तर मुंबईत भाजपला अशक्य

ब्राह्मणी बदक किंवा चक्रांग, चमचा पक्षी, धोबी, माशीमार, स्वर्गीय नर्तक असे हिवाळी स्थलांतरित पक्षी आता जिल्ह्यात दाखल झाले आहेत, अशी माहिती पक्षीतज्ज्ञ तुषार पाटील यांनी दिली. 

अतिवृष्टी आणि दीर्घकालीन पावसाळ्यामुळे किटकांची संख्या वाढली आहे. हिमालय आणि उत्तरी देशातून येणाऱ्या माशीमार प्रजातीतील पक्ष्यांचे हे मुख्य अन्न असल्याने त्यांची संख्या जिल्ह्यात अधिक दिसून येते; पण त्यांची संख्या नेमकी किती, हे नेमके सांगणे कठीण आहे. 
- प्रथमेश देशपांडे, पक्षीतज्ज्ञ 

स्थलांतरित पक्ष्यांचे आगमन थोडे उशिराने झाले असले, तरी नित्याने येणारे सर्व पक्षी आता नजरेस पडत आहेत. माशीमार प्रजातीच्या पक्ष्यांची संख्या अधिक दिसून येत आहे. पक्षीनिरीक्षक याबाबत सातत्याने नोंदी घेत आहेत. 
- प्रदीप कुळकर्णी, पक्षी-अभ्यासक