मुंबई: गेली दीड वर्षे कोरोनामुळे (corona) शिक्षणक्षेत्राची अपरिमित हानी (education loss) झाल्याबद्दल विप्रोचे संस्थापक अध्यक्ष (vipro chairman) अझीम प्रेमजी (azim premji) यांनी चिंता व्यक्त केली असून ही हानी भरून काढण्यासाठी विशेष प्रयत्न व्हावेत असे आवाहन केले आहे. बाँबे चार्टर्ड अकाउंटंट्स सोसायटी च्या 73 व्या स्थापनादिनाच्या निमित्ताने आयोजित विशेष समारंभात ते बोलत होते. कोविडकाळात झालेले नुकसान भरून काढण्यासाठी चांगल्या दर्जाचे सार्वजनिक शिक्षण महत्वाचे असल्याचेही ते म्हणाले. (one & half year corona situation education loss vipro chairman azim premji concern)

दीड वर्षांत शिक्षणातील नुकसान भरून काढण्यासाठी आपल्या शेजारच्या मोकळ्या परिसरात खुले शिक्षण, शिक्षकांचे लसीकरण मुद्यांवर भर दिला पाहिजे. सध्या शाळा बंद असल्याने सामान्य मुलांना शिक्षणापासून वंचित रहावे लागत आहे. त्यासाठी आपल्याच परिसरात मोकळ्या जागी खुल्या आकाशाखाली शाळा घ्याव्यात, त्यामुळे कोरोनाची लागण होण्याचा धोका कमी होईल.

शिक्षकांचेही लसीकरण झाल्यावर धोका संपूर्णपणे संपेल. त्यानंतर कोरोनाकाळात झालेला तोटा विसरता कामा नये, तो भरून काढण्यावर भर दिला पाहिजे. त्यासाठी शिक्षकांना विशेष साह्य करून जरुर तर पुढीलवर्षी मुलांनाही वेगळे शिक्षण द्यावे, असेही प्रेमजी म्हणाले.

कोविडचे सावट संपल्यावर आरोग्य, शिक्षण आणि रोजगार या क्षेत्रांची पुनर्बांधणी करण्यात आपण सर्वांनीच सरकारला सहकार्य केले पाहिजे, यावरही त्यांनी भर दिला. या क्षेत्रात प्रशासनाचा हेतू चांगला असतो, त्यांचा तळागाळात संपर्कही असतो तसेच साधनसामुग्रीही असते. मात्र टिपिकल बाबुशाही यंत्रणेतून बाहेर पडून काम करण्यात प्रशासन कमी पडते. त्यामुळे या कामात सरकारची मदत केली तर एकमेकांच्या मदतीने सर्वांचाच उत्कर्ष होईल, अशी खात्रीही प्रेमजी यांनी व्यक्त केली. या ऑनलाईन संमेलनात सोसायटीचे अध्यक्ष सुहास परांजपे, माजी अध्यक्ष नौशाद पंजवानी आदींनीही आपले विचार मांडले.