मुंबई : सोन्यातील तेजीने ग्राहकांचे डोळे दिपले असले तरी यंदा विक्री वाढेल, असा विश्‍वास सराफांकडून व्यक्‍त करण्यात येत आहे. साडेतीन मुहूर्तांपैकी एक असलेल्या धनत्रयोदशीनिमित्त दागिने, गोल्ड ईटीएफ आणि गोल्ड बॉंडचा पर्याय ग्राहकांना निवडता येणार आहे. मुंबईतील झवेरी बाजार, दादर, परळ, लालबाग येथील प्रमुख सराफांनी सोने खरेदीवर सवलती जाहीर केल्या आहेत.

मुंबईत सोन्याचा भाव प्रती दहा ग्रॅमला 31 हजार 700 रुपयांच्या आसपास आहे. दिल्लीत सोने दर 32 हजार 780 रुपयांवर गेला आहे. जागतिक बाजारातील तेजीचे पडसाद भारतीय बाजारावर उमटले आहेत. सोन्यातील तेजीने बाजारात सकारात्मक वातावरण आहे. दसऱ्यापासून ग्राहकांची वर्दळ वाढली असून यंदा विक्री वाढेल, असे चिंतामणी ज्वेलर्सचे नितीन कदम यांनी सांगितले. 

गोल्ड "ईटीएफ'चे खास सौदे 
गोल्ड ईटीएफमधील मुहूर्ताच्या सौद्यांसाठी मुंबई शेअर बाजार आणि राष्ट्रीय शेअर बाजारात जादा वेळ ठेवण्यात आली आहे. संध्याकाळी साडेचार ते सात वाजेपर्यंत गुंतवणूकदारांना गोल्ड ईटीएफ खरेदी करता येतील, असे शेअर बाजाराने जाहीर केले आहे. त्याचबरोबर गुंतवणूकदारांना गोल्ड बॉंडची खरेदी करता येणार आहे. 

सवलतीत सुवर्ण रोखे 
केंद्र सरकारने सार्वभौम सुवर्ण रोख्यांची (गोल्ड बॉंड) घोषणा केली आहे. 5 ते 8 नोव्हेंबरदरम्यान गोल्ड बॉंडची खरेदी करता येणार आहे. या योजनेत एक ग्रॅम गोल्ड बॉंडसाठी 3 हजार 183 रुपये निश्‍चित करण्यात आले आहेत. गोल्ड बॉंडची ऑनलाईन खरेदी करणाऱ्या ग्राहकांना 50 रुपये प्रती ग्रॅम सवलत दिली जाईल. टपाल कार्यालये, बॅंका, स्टॉक होल्डिंग कॉर्पोरेशन आदी ठिकाणी गोल्ड बॉंड उपलब्ध आहेत.