मुंबईतील मीरा-भाईंदर परिसरात झोपडपट्टीला भीषण आग लागल्याची घटना आज पहाटेच्या सुमारास घडली आहे. भाईंदर पूर्व येथील आझाद नगर झोपडपट्टीला भीषण आग लागली आहे. आग इतकी भीषण आहे, त्या आगीच्या धुराचे लोट अनेक किलोमीटरपर्यंत पसरले आहेत. आज पहाटे पाच वाजण्याच्या सुमारास अचानक झोपडपट्टीत आग लागली. अद्याप ही आग नियंत्रणात आलेली नाही.

मिळालेल्या माहितीनुसार, आगीच्या या घटनेत एका व्यक्तीचा मृत्यू झाल्याचं समोर येत आहे. दीपक चौरसिया मृत व्यक्तीचे नाव आहे. यामध्ये एक लहान मुलगा जखमी झाला आहे. तर, आगीत होरपळून अनेकजण जखमी झाले आहेत. आगीतून बाहेर पडणारा काळा धूर परिसरात पसरला आहे.

या भीषण आगीत अनेक झोपडया व गोदामे जळून खाक झाली आहेत. आग लागलेली जागा सामाजिक वनीकरण व मैदानासाठी राखीव असल्याची माहिती समोर आली आहे. या परिसरातील सर्व बांधकामे अनधिकृत असल्याची माहिती आहे. महापालिका आयुक्त संजय काटकर व अन्य अधिकारी, पोलीस उपायुक्त घटनास्थळी दाखल झाले आहेत.

आगीवर नियंत्रण मिळवण्याचे प्रयत्न सध्या सुरू आहेत. भाईंदर पूर्व येथील गोल्ड नेस्ट सर्कलजवळील आझाद नगर झोपडपट्टीत ही आग लागली आहे. आगीचं कारण अद्याप अस्पष्ट आहे. घटनेची माहिती मिळताच अग्निशमन दलाच्या अधिकाऱ्यांनी घटनास्थळी धाव घेत आगीवर नियंत्रण मिळवण्यास सुरुवात केली. मात्र, परिसरात असलेल्या प्लास्टिकच्या सामानामुळे आग आणखीच पसरत आहे.

अग्निशमन दलाकडून सध्या आग आटोक्यात आणण्यासाठी शर्थीचे प्रयत्न सुरु आहेत. मात्र, अद्याप आगीवर नियंत्रण मिळवण्यास यश मिळालेलं नाही. या आगीत मोठ्या प्रमाणावर नुकसान झालं आहे. या घटनेचे फोटो आणि व्हिडीओ सोशल मिडीयावर व्हायरल होताना दिसत आहेत.

अग्निशमन दलाच्या जवानासह काही जण जखमी

महापालिका आयुक्त संजय काटकर यांनी दिलेल्या माहितीनुसार, आग विझवताना अग्निशमन दलाचा एक जवान जखमी झाला आहे. मुंबई, ठाणे आणि वसई महानगरपालिकेकडून अग्निशमन यंत्रे मागवण्यात आली आहेत, यावरून आगीची भीषणता लक्षात येत आहे.

24 अग्निशमक वाहने घटनास्थळी

एकूण 24 अग्निशमक वाहन आग विझवण्याचं काम करत आहेत. अग्निशमन दलाकडून शर्थीचे प्रयत्न सुरु आहेत.