मुंबई : जगात कोरोना व्हायरसनं थैमान घातलं आहे. मात्र दिलासा देणारी बाब म्हणजे बहुतांश रुग्ण कोरोनातून उपचारानंतर पूर्ण बरे झाले आहेत. या रुग्णांच्या शरीरात कोरोना व्हायरसचा सामना करणाऱ्या अँटीबॉडीज तयार झाल्या आणि त्यामुळे हे रुग्ण बरे झाले आहेत. मात्र आता अशा रुग्णांचं रक्त ऑनलाईन विक्रीला ठेवण्यात आलं आहे.

कोरोनाच्या उपचारानंतर रुग्णांच्या शरीरात असणाऱ्या रक्तात अँटीबॉडीज तयार होतात. या अँटीबॉडीज शरीरात असणाऱ्या या कोरोना व्हायरसचा सामना करून त्यांना नष्ट करण्याचं काम करतात. यामुळे रुग्ण पूर्णपणे बरा होतो. रुग्णाला बरं वाटल्यानंतरही या अँटीबॉडीज भरपूर काळापर्यंत या व्यक्तीच्या रक्तात असतात. त्यामुळे अशा रुग्णाचं रक्त इतर रुग्णांसाठी फायद्याचं असतं असं डॉक्टरांचं म्हणणं आहे.

स्पेशल क्षण, फोटो, लव नोट्स ! लॉकडाऊनच्या काळात डिजीटल प्रेमाला फुटले धुमारे

मात्र आता डार्कनेटवर कोरोनातून बरे झालेल्या रुग्णाचं रक्त म्हणून रक्ताची विक्री केली जातेय. हे रक्त विकत घ्या आणि तुमच्या शरीरात रोग प्रतिकारक क्षमता वाढवा असं आवाहन करून याचा काळाबाजार केला जातोय. विशेष म्हणजे डार्कनेटवर हे रक्त प्रति लिटर १० लाखांच्या दरानं विकलं जातंय.

फक्त रक्तच नाही तर मास्क, ग्लोव्स, पीपीई सूट यासारख्या गोष्टीसुद्धा डार्कनेटवर दुप्पट किंवा तीनपट दरात विकल्या जात आहेत. ऑस्ट्रेलियाच्या नॅशनल युनिव्हर्सिटीच्या म्हणण्यानुसार तब्बल १२ पेक्षा जास्त डार्कनेट मार्केट या गोष्टींचा काळाबाजार करत आहेत. विशेष म्हणजे  या कंपन्यांकडून कुठल्याही देशात शिपिंग करण्याचं आश्वासन दिलं जातंय. अमेरिका, युरोप, ब्रिटन इथे या काळाबाजार करणाऱ्या धंद्यांचं प्रमाण अधिक आहे.

धक्कादायक ! उपचारांनंतरही फुफ्फुसांमध्ये लपून राहतो कोरोना? काय सांगतायत वैज्ञानिक?

डार्कनेटवर कोरोनाची असुरक्षित लस, गोळ्या, पीपीई सूट, मास्क आणि यशस्वी उपचार झालेल्या रुग्णाचं रक्त यांचा काळाबाजार मोठ्या प्रमाणावर सुरु आहे. येणाऱ्या काळात हा अजून वाढण्याची शक्यता आहे. त्यामुळे प्रत्येक देशांच्या सरकारनं याकडे लक्ष देणं आवश्यक आहे असं जाणकारांचं मत आहे.