डोंबिवली : मार्च महिन्यापासून उन्हाचा पारा हा 40 अंशाच्या (Summer hit) पार गेला असून माणसांना याचा त्रास होत आहे. वाढत्या उन्हाचा त्रास लोकांना होत असताना मुक्या प्राण्यांनाही त्यांची झळ पोहोचत आहे. असेच एक माकड पाण्याच्या शोधात (water need) माळशेज घाटात फिरत असताना पोलिस हवालदार संजय गुढे (Police sanjay gudhe) यांनी पाहिले. त्यांनी तत्काळ गाडी थांबवून जवळील बॉटल मधील पाणी या माकडाला पाजले. माकडाला पाणी पाजतानाचा त्यांचा व्हिडीओ समाज माध्यमावर प्रचंड व्हायरल (video viral on social media) होत असून त्यांचे कौतुक प्राणीप्रेमींकडून केले जात आहे.

सोशल मीडियावर नुकताच एक व्हिडीओ व्हायरल झाला असून त्यामध्ये एक पोलिस कर्मचारी एका माकडाला आपल्या पाण्याच्या बाटलीमधून पाणी पाजून त्याची तहान शमवताना दिसत आहे. या व्हिडीओची माहिती काढली असता मुरबाड तालुक्यातील माळशेज घाटातील हा व्हिडीओ असल्याचे समजले. महामार्ग पोलिस दलातील माळशेज घाट येथे पोलिस हवालदार म्हणून कार्यरत असलेले संजय हे काही दिवसांपूर्वी घाटातून जात असताना रोडच्या बाजूला एक माकड पाण्याच्या शोधात त्यांना दिसले.

भर दुपारची वेळ व कडक ऊन असल्याने त्यांनी लागलीच त्यांची गाडी बाजूला घेत स्वतःजवळ असलेल्या पाण्याच्या बाटलीतील पाणी त्या माकडाला दिले. उन्हामुळे तहान लागत असून पाण्याअभावी माणसांचा जीव कासाविस होतो. मुक्या प्राण्यांचीही तळमळ होत असून त्यांना पाण्याच्या शोधात लांब लांब फिरावे लागते. सदर माकड हे पाण्याअभावी कासाविस झाले होते म्हणून मी त्याला पाणी पाजल्याचे संजय यांनी सांगितले. संजय यांनी पशू प्राण्यांविषयी दाखविलेल्या या माणूसकीमुळे त्यांचे सर्वत्र कौतुक होत आहे.