मुंबई: समयसूचकता आणि वेळीच झटपट पावलं उचलून मुंबई पोलिसांनी आत्महत्या करायला निघालेल्या एका व्यक्तीचे (Police Saves Man) प्राण वाचवले. व्हॉट्स अ‍ॅप स्टेटसवरुन या व्यक्तीने आत्महत्येचा विचार व्यक्त केला होता. पतीचं हे स्टेटस (whatsapp status) पाहिल्यानंतर पत्नी लगेच सर्तक झाली. तिने लगेच पोलिसांना याची माहिती दिली व पतीला शोधण्यासाठी पोलिसांकडे मदत मागितली. (Police Saves Mumbai Man Who Shared His Parting Words On WhatsApp)

पोलिसांनी सुद्धा झटपट पावलं उचलत त्या व्यक्तीला शोधून काढलं. पोलिसांना घाटकोपर रेल्वे स्थानकावर हा व्यक्ती सापडला. पोलिसांनी त्याला सुखरुप घरी सोडले. 'समुपदेशनानंतर त्या व्यक्तीला सुखरुप त्याच्या कुटुंबाकडे सोडलं' असं मुंबई पोलिसांनी सोशल मीडियावरील पोस्टमध्ये म्हटलं आहे.

मुंबई पोलिसांनी शुक्रवारी त्यांच्या इन्स्टाग्राम पोस्टवरुन या घटनेची माहिती दिली व 'स्टेटस अपडेट: सेफ' असे टायटल दिले आहे. पोलिसांनी त्या व्यक्तीच्या कुटुंबासोबत काढलेला फोटोही पोस्ट केला आहे. फक्त त्याची ओळख जाहीर केलेली नाही. पोलिसांनी झटपट उचललेल्या पावलांच सर्वत्र कौतुक होत आहे. अनेकांनी कमेंटमधुन पोलिसांच कौतुक केलं आहे.

"लाखो लोकांना आयुष्यात अशा कठिण प्रसंगातून जावं लागतं. त्या व्यक्तीला आनंद आणि शांतता मिळो. देव त्या व्यक्तीला या कठिण परिस्थितीतून लवकरात लवकर बाहेर काढो, अशी मी प्रार्थना करतो" असं अदिल मिस्त्री या युझरने म्हटलं आहे. इतरांनी पोलीस अधिकाऱ्यांच कौतुक केलेय पण पोलिसांनी मास्क घातलं नसल्याचही निदर्शनास आणून दिलय.