मुंबई-गोवा क्रूझवर सुरु असलेली रेव्ह पार्टीवर मोठ्या कारवाईनंतर नार्कोटिक्स कन्ट्रोल ब्युरोचे (NCB) अधिकारी समीर वानखेडे यांनी तपासाबाबत महत्वाची माहिती दिली आहे. या प्रकरणी अनेक व्हॉट्सअॅप चॅट मिळाले आहेत त्यावरुन काही महत्वाचे धागेदोरे हाती लागले आहेत, असं त्यांनी माध्यमांशी बोलताना सांगितलं.

या प्रकरणात राजकीय सहभागाची चर्चा असल्याबद्दल वानखेडे यांना विचारण्यात आल्यानंतर त्यांनी याप्रकरणी बोलण्यास नकार दिला. पण या केवळ अफवा आहेत त्यामुळे तुम्ही असे प्रश्न मला विचारु नका, असंही ते माध्यम प्रतिनिधींना म्हणाले.

दरम्यान, या बड्या कारवाईबाबत सांगताना समीर वानखेडे म्हणाले, "याप्रकरणी एनसीबीला खबऱ्यांकडून खबर मिळाली होती. या धाडीमध्ये विविध प्रकारचे ड्रग्ज आम्ही जप्त केले आहेत. अजूनही याचा तपास सुरु असून यामधील तपासातून आणखी काही माहिती हाती येईल. आज तीन जणांना आम्ही कोर्टात सादर केलं. त्यांना एक दिवसाची कोठडी कोर्टाने दिली याशिवाय इतर पाच जणांनाही आम्ही अटक केली आहे. त्यांनाही उद्या कोर्टात हजर करण्यात येणार आहे.