नवी मुंबई : महिन्यापूर्वी ऊन-पावसाच्या सुरू असलेल्या खेळामुळे अनेक शेतकऱ्यांनी पालेभाज्यांची लागवड थांबवली होती. मात्र, त्यानंतर पोषक असे वातावरण तयार झाल्यामुळे मोठ्या प्रमाणात भाजीपाला पिकांची लागवड करण्यात आली. त्यामुळे घाऊक बाजारात भाजीपाल्याची आवक वाढली असून, दरात मोठी घसरण झाली आहे. मेथी, शेपू यांसारख्या पालेभाज्या तर घाऊक बाजारात 10 ते 15 रुपये जुडी या दराने मिळत आहेत. 

ही बातमी वाचली का?- आवक वाढल्याने कांद्याच्या दरात घसरण! पाहा किती घसरला..
 

पालेभाज्यांबरोबरच फळ भाज्यांची आवकही वाढली आहे. त्यामुळे सर्वसामान्य भाज्यांचे दर घाऊक बाजारात किलोमागे 40 ते 50 रुपयांनी कमी झाले आहे. वाटाणा 25 ते 35 रुपये किलो झाला आहे. त्यामुळे किरकोळ बाजारात भाज्या 50 रुपये किलोपर्यंत मिळत आहेत. फळभाज्यांपेक्षा पालेभाज्यांचे दर कमी असतात. त्यामुळे गृहिणी फळभाज्यांच्या जागी पालेभाज्यांचा पर्याय निवडतात. आता पालेभाज्यांचे दरही घसरले आहेत. त्यामुळे पालेभाज्यांना बाजारात मागणी जास्त आहे. घाऊक बाजारात पंधरा दिवसांपूर्वी 15 ते 20 रुपयांना मिळणारी मेथीची जुडी आता 10 ते 15 रुपये झाली आहे; तर 25 ते 30 रुपये असणारी शेपूची जुडी 15 ते 20 रुपये झाली आहे. 7 ते 10 रुपये जुडी असणारा पालक 4 ते 5 रुपये जुडी झाला आहे. 4 ते 5 रुपयांना मिळणारा पुदिना 3 ते 4 रुपये झाला आहे. 10 ते 14 रुपये असणारी कांदा पात 10 ते 12 रुपये झाली आहे. 

ही बातमी वाचली का?- पश्चिम रेल्वेच्या बम्बार्डियर लोकल होणार सुसाट

कोथिंबीर 20 ते 25 रुपये जुडी 
गेल्या महिन्यात कोथिंबीरची आवक घटली होती. त्यामुळे कोथिंबिरीच्या दरात वाढ होत 100 रुपये जुडीपर्यंत कोथिंबीर गेली होती. मात्र, आता आवक वाढल्यामुळे कोथिंबीरीचा दर 20 ते 25 रुपये जुडीवर आला आहे. घाऊक बाजारात दरात घसरण झाली असली तरी किरकोळ बाजारात मात्र जादा दराने भाजीपाला विकला जात आहे. 

ही बातमी वाचली का?- मुंबईतील मच्छीमारांचा प्रश्न सुटणार; वाचा काय आहे बातमी..
 
तुलनात्मक दर (रुपये/प्रति जुडी) 
भाजीपाला     गुरुवारचे      पंधरा दिवसांपूर्वीचे 
मेथी        10 ते 15         15 ते 20 
शेपू         15 ते 20         25 ते 30 
पालक       4 ते 5           7 ते 10 
पुदिना       3 ते 4           4 ते 5 
कांदा पात    10 ते 12        10 ते 14