वादग्रस्त पोलीस अधिकारी सचिन वाझे यांना शनिवारी रात्री एनआयएने अटक केली. अंबानी यांच्या बंगल्यासमोर सापडलेल्या स्फोटकांच्या प्रकरणी त्यांच्यावर कारवाई करण्यात आली. ती स्फोटकांनी भरलेली कार अंबानींच्या निवासस्थानाबाहेर ठेवण्याच्या कटात वाझे सामील असल्याचा ठपका ठेवत त्यांनी अटक करण्यात आली. या प्रकरणावर रविवारी सकाळपासूनच सत्ताधारी आणि विरोधक अशा दोन्ही नेत्यांकडून अनेक प्रतिक्रिया आल्या. भाजपचे विधान परिषदेचे विरोधी पक्षनेते प्रवीण दरेकर यांनी सचिन वाझे प्रकरणावरून मुख्यमंत्री उद्धव ठाकरेंवर टीकास्त्र सोडलं. तसेच, ठाकरे सरकारला काही सवालही केले.

"भाजप पक्ष या प्रकरणात पहिल्या दिवसापासून आक्रमक आहे. हिरेन यांच्या पत्नीने सचिन वाझेंवर हिरेन यांच्या हत्येचा आरोप केल्यानंतर वाझेंचे निलंबन करून त्यांना अटक करावी अशी आमची मागणी होती. आता कोर्टाने जामीन अर्ज फेटाळल्यानंतर त्यांची चौकशी करून त्यांना अटक करण्यात आली. पण आता प्रश्न असा आहे की मुख्यमंत्री उद्धव ठाकरे यांनी सचिन वाझे हा ओसामा बिन लादेन आहे का असा सवाल विरोधकांना केला होता. वाझे लादेन आहे असं आम्हाला म्हणायचं नाही पण किमान तो आरोपी आहे एवढं तर आता तुम्ही कबूल कराल की नाही", असा प्रश्न विधान परिषद विरोधी पक्षनेते प्रवीण दरेकर यांनी उपस्थित केला. तसेच, संजय राऊत यांनी पत्रकार परिषद घेऊन वाझेंची पाठराखण केली. त्यानंतर दरेकर यांनी खोचक ट्वीट केलं.

"सचिन वाझे नेमका कोण आहे? यावर आता भाष्य होण्याची आवश्यकता आहे. कारण या विषयावर मुख्यमंत्री किंवा सरकारची भूमिका आली नाही तर आणखी संशय वाढेल. आता राज्याच्या मुख्यमंत्र्यांकडे वाझेच्या निलंबनाची कारवाई करून सरकारचं त्यांना समर्थन नाही हे दाखवण्याची संधी आहे. विरोधी पक्षाकडे जेव्हा पुरावे जातात, तेव्हा जनतेच्या मनात सरकारची विश्वासार्हता कमी होते. तुम्हाला दस्तावेज मिळत नाहीत हे तुमचं अपयश आहे. कारण तुमच्याकडे यंत्रणा असूनही तुम्ही काही करत नाही", असा टोला दरेकरांनी महाविकास आघाडी सरकारला लगावला.

हे नक्की वाचा- सचिन वाझे प्रकरण: संजय राऊतांना भाजपच्या केशव उपाध्येंचा टोला

"जनता विरोधी पक्षाकडे पुरव्यासहित येत आहे. त्यात संजय राऊत वाझे प्रकरणावर पत्रकार परिषद घेत आहेत. या सगळ्या गोष्टींचा अर्थ कसा काढायचा?", असा सवालही त्यांनी केला.