Sakal Mahabrands 2023 : देशातील गरीबी ही महत्वाची समस्या आहे. ही गरीबी दूर व्हावी म्हणून प्रत्येक राजकीय पक्ष आपल्या परीनं आश्वासनं देत असतात. पण ही समस्या दूर करण्यासाठी राज्याचे उपमुख्यमंत्री आणि अर्थमंत्री देवेंद्र फडणवीस यांनी केवळ पाच वाक्यात गरीबी कशी दूर करता येईल याचा उपाय सांगितला आहे. सकाळ माध्यम समुहाच्या ब्रँड्स ऑफ महाराष्ट्र या कार्यक्रमात उद्योजकांना प्रोत्साहित करताना फडणवीस बोलत होते.

फडणवीस म्हणाले, गरीबी जर दूर करायची असेल तर संपत्ती निर्माण झाल्याशिवाय गरीबी दूर होऊ शकत नाही. त्यामुळं संपत्ती निर्मितीकडं सकारात्मक नजरेनं बघितलं पाहिजे. संपत्ती निर्मितीबरोबर संपत्तीचं वाटप हा ही महत्वाचा घटक असतो, तो निश्चितपणे घडत असतो. पण संपत्तीच निर्माण झाली नाहीतर तीच कधीच वाटप होऊ शकत नाही. (Latest Marathi News)

म्हणून जे संपत्ती निर्मिती करत आहेत त्यांना जास्तीत जास्त प्रोत्साहन कसं देता येईल, याकडं आपण पाहिलं पाहिजे. संपत्ती कशी तयार करता येईल, त्यातून अधिकाधिक लोकांना रोजगार देणं तसेच त्यातून अधिकाधिक लोकांपर्यंत समृद्धी पोहोचणं अशा पद्धतीनं गरीबी दूर करण्यासाठी काम करता येईल, असं फडणवीस यांनी यावेळी सांगितलं. (Marathi Tajya Batmya)

दरम्यान, देशात सर्वात जास्त पायाभूत सुविधा महाराष्ट्रात तयार होत आहेत. आपण ५ लाख कोटी रुपयांची गुंतवणूक पायाभूत सुविधांमध्ये करतो आहोत. महाराष्ट्रातील सध्या सुरु असलेल्या या प्रकल्पांमुळं गुंतवणूक वाढणार असून नव्या संधी निर्माण होणार आहेत, असंही यावेळी देवेंद्र फडणवीस यांनी सांगितलं.