मुंबई : राष्ट्रवादी काँग्रेसचे नेते नवाब मलिक यांचे जावई समीर खान यांचं निधन झाल्याचं वृत्त समोर आले आहे. काही दिवसांपूर्वीच त्यांचा अपघात झाला होता. यानंतर त्यांच्यावर उपचार सुरु होते. मात्र आता त्यांचा मृत्यू झाल्याची माहिती मिळते आहे. याबाबत नवाब मलिक यांनी ट्विट करत माहिती दिली आहे.

सप्टेंबर महिन्यात समीर खान यांचा कुर्ल्यात कार अपघात झाला होता. यामध्ये ते गंभीर जखमी झाले होते. नवाब मलिक यांची मुलगी आणि जावई रुग्णालयातून नियमित चेकअपनंतर घरी परतत असताना त्यांचा अपघात झाला होता. जेव्हा ते कारमध्ये बसत होते तेव्हा कार चालकानं चुकून एक्सलेटर दाबला. त्यानंतर कार एका भिंतीला जाऊन धडकली. या अपघातात समीर खान यांच्या डोक्याला गंभीर दुखापत झाली होती. त्यानंतर त्यांना आयसीयूमध्ये उपचार सुरु होते. मात्र आता त्यांची प्राणज्योत मालवली आहे.

ट्विटमध्ये नवाब मलिक म्हणाले की, माझे जावई समीर खान यांचे निधन झाले आहे. अल्लाह त्यांना जन्नतमध्ये सर्वोच्च स्थान देवो. या नुकसानीबद्दल आम्ही शोक व्यक्त करत असल्याने, पुढील दोन दिवसांचे माझे सर्व नियोजित कार्यक्रम पुढे ढकलण्यात आले आहेत. तुम्ही समजून घेतल्याबद्दल धन्यवाद, कृपया त्याला तुमच्या आठवणीत ठेवा.

या अपघातासंदर्भात पोलिसांनी थार चालवणाऱ्या ३८ वर्षीय चालक अबुल मोहम्मद अन्सारी याला ताब्यात घेतले होते. त्याच्यावर गुन्हा दाखल करण्यात आला असून पुढील तपास सुरू होता.