मुंबई - महाराष्ट्र राज्य माध्यमिक व उच्च माध्यमिक शिक्षण मंडळाने कारभार ‘हायटेक’ करण्याचा निर्णय घेतला आहे. त्यासाठी मंडळाने माध्यमिक शाळा व कनिष्ठ महाविद्यालयांना नवे प्रोफाइल तयार करण्याचे आदेश दिले आहेत.

शिक्षण मंडळाशी संलग्न शाळा आणि कनिष्ठ महाविद्यालयांची अद्ययावत माहिती उपलब्ध करताना दर वर्षी अडचणी येतात. शाळा महाविद्यालयांकडून अनेकदा जुनीच माहिती उपलब्ध करून दिली जाते. त्यामुळे हे आदेश देण्यात आले आहेत. शाळांनी सध्याची माहिती ऑनलाइन भरायच्या सूचना मंडळाने दिल्या आहेत. संपूर्ण सप्टेंबर महिन्यात हे कामकाज केले जाणार आहे.

त्यासाठी समितीही स्थापन करण्यात आली असून, याबाबतचे परिपत्रकही जारी केले आहे. शाळा व कनिष्ठ महाविद्यालयांनी भौगोलिक माहिती गुगल मॅपवरून द्यावी, अशी सूचनाही मंडळाने केली आहे. युडायस आयडी, ओटीपी, पासवर्ड यांसारख्या आधुनिक प्रणाली वापरण्यात येणार  आहे. या माहितीत होणाऱ्या बदलाची नोंद घेण्यासाठी ०२०-२५७०५२०५ असा  क्रमांक व srateboardonline@gmail.com हा ईमेल  देण्यात आला आहे.