मनोर/ बोईसर - तारापूर औद्योगिक वसाहतीच्या सांडपाणी प्रक्रिया केंद्रातून सोडलेल्या पाण्यामुळे समुद्राचे पाणी काळवंडल्याचे आढळून आले आहे. तटरक्षक दलाच्या जवानांनी हेलिकॉप्टरमधून काढलेल्या चित्रफितीमुळे हा प्रकार उघडकीस आला आहे. यामुळे स्थानिक नागरिक आणि पर्यावरणप्रेमींकडून संताप व्यक्त केला जात आहे. दरम्यान, सांडपाण्यावर प्रक्रिया करण्यात आली होती, पण कलर रिमुव्हलची प्रक्रिया न करता ते सोडले असल्याचे प्रदूषण नियंत्रण मंडळाने म्हटले आहे.

वाढत्या प्रदूषणामुळे तारापूर औद्योगिक वसाहतीला सर्वांत प्रदूषित वसाहतीचा शिक्का बसला आहे. राष्ट्रिय हरित लवादाकडून औद्योगिक वसाहतीमधील प्रदूषणकारी कारखान्यांना दंड ठोठावण्यात आला आहे. तारापूर औद्योगिक क्षेत्रातील कारखान्यांमधून दररोज सुमारे ५० एमएलडीपेक्षा अधिक घातक रासायनिक सांडपाणी सोडले जाते. सद्यस्थितीत जुने २५ एमएलडी क्षमतेचे सांडपाणी प्रक्रिया केंद्र बंद करण्यात आले आहे. नवीन ५० एमएलडी सांडपाणी प्रक्रिया केंद्र निम्म्या क्षमतेने कार्यरत आहे.

मासेमारी संकटात

केमिकलयुक्त रासायनिक सांडपाणी छुप्या पद्धतीने समुद्रात सोडल्याने समुद्रासह परिसर विद्रुप झाल्याचे चित्र आहे. समुद्र दूषित झाल्याने माशांची संख्या कमी झाली आहे. त्यामुळे मासेमारीसाठी जीव धोक्यात घालून खोलवर जावे लागत आहे. प्रदूषणामुळे समुद्र खाडीतील ऑक्सिजनचे प्रमाण कमी होत आहे, दुर्गंधीही पसरत आहे.

सांडपाणी प्रक्रियेसाठी पाठवण्यात येते. तसेच टँकरचे पृथक्करण केल्यानंतरच पाणी घेतले जाते.

- प्रशांत गायकवाड, उपप्रादेशिक अधिकारी, प्रदूषण नियंत्रण मंडळ