• मराठा आरक्षणाच्या मुद्द्यावर मोदी-ठाकरे यांची दिल्लीत भेट

मुंबई: मुख्यमंत्री उद्धव ठाकरे (Uddhav Thackeray), उपमुख्यमंत्री अजित पवार (Ajit Pawar), मराठा उपसमितीचे अशोक चव्हाण (Ashok Chavan) आणि राज्याचे मुख्य सचिव सीताराम कुंटे (Sitaram Kunte) हे आज दिल्लीत आहेत. मराठा आरक्षणाबाबत (Maratha Reservation) सर्वोच्च न्यायालयाने दिलेल्या निर्णयानंतर या आरक्षणाचे महत्त्व पटवून देण्यासाठी उद्धव ठाकरे पंतप्रधान नरेंद्र मोदी (PM Modi) यांची भेटणार आहेत. या भेटीवर खासदार संजय राऊत यांनी आपली प्रतिक्रिया व्यक्त केली. (Shivsena Sanjay Raut Reaction on CM Uddhav Thackeray PM Modi Meeting on Maratha Reservation)

"मुख्यमंत्री उद्धव ठाकरे, उपमुख्यमंत्री अजित पवार आणि अशोक चव्हाण आज पंतप्रधानांची भेट घेत आहेत. आरक्षणाच्या प्रश्नावरून ही भेट होत आहे. त्यामुळे यात कोणताही राजकीय पक्षीय बलाबलाचा प्रश्न नाही. मुख्यमंत्री आरक्षणाच्या बाबतीत खूप काळजीपूर्वक काम करत आहेत. महाराष्ट्रात या विषयावरून आंदोलन होत आहेत. मोर्चे काढले जाताहेत. याच मुद्द्यावर काल शरद पवार आणि मुख्यमंत्र्यांचीही भेट झाली. महाराष्ट्रातील प्रत्येक नेत्याला वाटतं की मराठा आरक्षणाचा मुद्दा ताणला जाऊ नये. त्यामुळे आजच्या बैठकीत हा मुद्दा घेऊन गंभीरतेने चर्चा होईल आणि त्यावर मार्ग काढण्यासाठी चर्चा होईल", असा विश्वास त्यांनी व्यक्त केला.

उत्तर महाराष्ट्र दौरा-

"लवकरच आमचा उत्तर महाराष्ट्राचा 6 ते 7 दिवसांचा दौरा सुरू होणार आहे. आता पक्षबांधणी मजबूत करणं गरजेचे आहे. त्यासाठी आम्ही दौरे करतोय. शिवसेनेचे संघटन मजबूत असणं आणि पक्षाचा विस्तार करणे आमचं कर्तव्य आहे. ते आम्ही नक्कीच करू", अशी माहिती त्यांनी दिली.

राहुल गांधी आणि लसीकरण-

"राहुल गांधी यांनी लसीकरणाच्या कार्यक्रमावर टीका केली आहे. गांधी यांची एक वेगळी शैली आहे. त्यात नेहमीच तथ्य असतं. कोरोना असेल किंवा इतर काही गोष्टी असतील, ते ज्या-ज्या गोष्टींबद्दल बोलले होते, त्या बऱ्यापैकी खऱ्या ठरल्या आहेत. त्यामुळे सरकारने त्यांच्या वक्तव्याचा गांभीर्याने विचार करावा", असेही राऊत म्हणाले.