पनवेल : परिसरात राहणाऱ्या किराणा माल व रेशनिंग दुकानदाराला शुक्रवारी (ता. १७) कोरोनाची लागण झाली. कोरोनाबाधित ओला टॅक्‍सीचालकाच्या घरातील इतर दोन सदस्यांना कोरोनाचा संसर्ग असल्याचा अहवाल आल्याने पनवेलमध्ये एकाच दिवसांत पाच कोरोनाबाधित रुग्णांची भर पडल्याची माहिती पालिका आयुक्त गणेश देशमुख यांनी दिली. 

शुक्रवारी वाढलेल्या रुग्णसंख्येमुळे पनवेल पालिका हद्दीतील रुग्णांची संख्या आता ३१ वर जाऊन पोहचली असून, ग्रामीण पनवेलसह रायगड जिल्ह्यातील रुग्णांची संख्या ३८ वर गेली आहे.

वाचा हेही ...अन् मजुरांनी धूम ठोकली

आयुक्त देशमुख यांनी दिलेल्या माहितीनुसार शुक्रवारी सापडलेल्या रुग्णांमध्ये तक्का परिसरातील रेशनिंग दुकानचालक तसेच ओला टॅक्‍सीचालकाच्या घरातील दोन सदस्य अशा तीन रुग्णांच्या कोरोना चाचण्या पॉझिटिव्ह आल्या आहेत, तर काळुंद्रे परिसरात राहण्यास असलेल्या आणि भांडुप येथे औषध पुरवठा करण्यासाठी जाणे-येणे असलेल्या पुरवठादारासोबत कामोठे येथील एका रुग्णाची कोरोना चाचणी पॉझिटिव्ह आली आहे. 

अरे वाह.... रायगडचा आंबा ऑनलाईन

श्रीवर्धनमध्ये आणखी एकाला संसर्ग 
श्रीवर्धन : येथे शुक्रवारी कोरोनाबाधित व्यक्ती आढळून आली. हा कोरोनाबाधित रुग्ण 4 एप्रिलला श्रीवर्धन येथे आला असता, त्याला कोरोनांची प्राथमिक लक्षणे दिसण्यास सुरुवात झाली. उपचारासाठी त्याला श्रीवर्धन सरकारी रुग्णालयात दाखल केले. त्यानंतर पुढील चाचणीसाठी त्याला पनवेल येथील एमजीएम रुग्णालयात वर्ग करण्यात आले. संबंधित व्यक्तीचा कोरोना चाचणीचा अहवाल पॉझिटिव्ह आला आहे. त्यानंतर तालुका प्रशासनाने संबंधित रुग्णाच्या संपर्कातील व्यक्तींना कोरोना चाचणीसाठी पाठवल्याचे समजते.