मुंबई : तुटपुंज्या वेतनावर काम करणाऱ्या एसटी कर्मचाऱ्यांना महागाई भत्ता, वेतनवाढ, घरभाडे भत्ता मिळत नसल्याने दिवाळीपूर्वीच (Diwali) कर्मचारी संघटना संपाचे हत्यार उपसण्याच्या तयारीत आहेत. कोरोना काळात आर्थिक संकटामुळे २५ कर्मचाऱ्यांनी आत्महत्या केल्या, तर ३०० पेक्षा जास्त कर्मचाऱ्यांचा कोरोनाने (Corona) मृत्यू झाल्यानंतर राज्यातील २२ एसटी(S.T) कर्मचारी संघटनांनी एकत्र येऊन प्रलंबित मागण्यांसाठी कृती समिती तयार केली आहे. त्यानुसार लवकरच संपाची घोषणा करण्यात येणार आहे.

राज्य सरकारी कर्मचाऱ्यांच्या वेतनाच्या तुलनेत एसटी कर्मचाऱ्यांचे वेतन अत्यल्प आहे. शिवाय वेतन वेळेवर मिळत नसल्याने कर्मचारी आर्थिक संकटात सापडले आहेत. मंगळवारी (ता. १९) पार पडलेल्या २२ एसटी कर्मचाऱ्यांच्या संयुक्त कृती समितीच्या बैठकीचे समाज माध्यमांवर लाईव्ह प्रक्षेपण करण्यात आले होते.

राज्य एसटी कामगार संघटनेचे अध्यक्ष संदीप शिंदे आणि सरचिटणीस हनुमंत ताटे, महाराष्ट्र एसटी वर्कर्स काँग्रेस (इंटक)चे सरचिटणीस मुकेश तिगोटे, राज्य एसटी कामगार सेनेचे कार्याध्यक्ष विजय मालोकार, कास्ट्राईब एसटी कामगार संघटनेचे सुनील निरभवणे आणि महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांनी संयुक्त कृती समितीच्या बैठकीत आपल्या भूमिका मांडल्या.

दरम्यान, एसटी कर्मचाऱ्यांच्या प्रलंबित मागण्यांसाठी मंगळवारी तयार करण्यात आलेल्या संयुक्त कृती समितीतून बैठक संपताच संघर्ष एसटी कामगार युनियनने माघार घेतली आहे. कृती समितीच्या मागण्या तात्पुरत्या आहेत. कृती समितीचे कामगारांच्या मागण्यांवर समर्थन असेल, शिवाय समितीच्या भूमिकांना आम्ही विरोध करणार नाही. मात्र, कृती समितीसोबत आम्ही जाणार नसल्याचे संघर्ष एसटी कामगार युनियनचे सरचिटणीस शशांक राव यांनी सांगितले आहे