मुंबई:  कांजुरमार्ग येथील जागेच्या आरक्षणात राज्याच्या नगरविकास विभागाने बुधवारी बदल केला आहे. याबाबत विभागाने अधिसूचना जारी केली असून त्यानुसार येथील जागा मुंबई महानगर प्रदेश विकास प्राधिकरण यांच्या ताब्यात आली आहे. त्यामुळे भविष्यात जमिनीवर मेट्रो कारशेड आणि तत्सम कामे होण्याचा मार्ग मोकळा झाला आहे.

मुंबई महानगर प्रदेश विकास प्राधिकरणाने 2018 रोजी मौजे कांजूर येथील 43.76 हेक्टर जागा मेट्रो आणि इतर कामांसाठी वापरण्याकरिता आरक्षणात बदल करण्याची विनंती राज्य सरकारकडे केली होती. याव्यतिरिक्त कांजुर येथील मेट्रो साठी मुंबई महानगर प्रदेश विकास प्राधिकरण हे विशेष अधिकारी म्हणून काम पाहत असून मुंबई महानगर प्रदेश विकास प्राधिकरण यांची विनंती आणि मुंबई महापालिकेचा अहवाल या दोन्ही गोष्टींचा विचार करता येथील जमीन सार्वजनिक हितासाठी वापरणे योग्य आहे, असे अधिसूचनेत नमूद करण्यात आले आहे.

हेही वाचा- अधिवेशनाच्या शेवटच्या दिवशी अर्थमंत्र्यांकडून आमदारांना स्पेशल गिफ्ट

या सर्व गोष्टींचा विचार करता, झालेला विचारविनिमय, घेण्यात आलेला सल्ला, तज्ज्ञांचे मार्गदर्शन आणि इतर घटकांमुळे कांजुर येथील जागेच्या आरक्षणात बदल करणे योग्य असल्याचा निर्वाळा विभागाने अधिसूचनेत दिला आहे. त्यानुसार सदर फेर बदल मंजूर करणे गरजेचे असल्याचे मत नगर विकास विभागाने मांडले आहे. या सर्व प्रक्रियेनंतर सदर जमिनी वरील आरक्षण बदल करण्याबाबत हालचाली झाल्या असून आजच्या अधिसूचनेनंतर येथील मेट्रो डेपोचा मार्ग मोकळा झाला आहे. 

मुंबई विभागातल्या ताज्या बातम्या वाचण्यासाठी येथे क्लिक करा.

आरेमधील मेट्रोशेड कांजूरमार्ग येथील सरकारी जमिनीवर करण्याचा निर्णय घेतल्याची घोषणा राज्य सरकारने केली होती. कुलाबा-वांद्रे-सीप्झ मेट्रो 3 , समर्थनगर ते विक्रोळी 6 लाईन एकत्रिकरणामुळे पैसा वाया जाणार नाही, असा सरकारचा दावा आहे. वडाळा ते कासरवडवली (मेट्रो-4), कासरवडवली ते गायमूख (4-अ) या मेट्रोचे शेड कांजूरला होईल, असे एमएमआरडीएने स्पष्ट केले. मेट्रो-3, 4, 6 चे शेड कांजूरमध्ये झाले तर जमीन, पैसा वाचेल. कनेक्टिव्हीटी वाढेल. म्हणून शेडसाठी कांजूरचे नाव पुढे केले जात आहे.

----------------------------

(संपादन- पूजा विचारे)

State urban development department changed reservation land at Kanjurmarg