नवी मुंबई : नेरुळ सेक्‍टर-१८ मध्ये राहणाऱ्या एका व्यक्तीने राहत्या घरात गळफास घेऊन आत्महत्या केल्याची घटना उघडकीस आली आहे. धनंजय गलांड (३७) असे या व्यक्तीचे नाव असून, त्याने आर्थिक अडचणीमुळे आलेल्या नैराश्‍येतून आत्महत्या केल्याचे बोलले जात आहे.

मृत धनंजय गलांड हा नेरुळ सेक्‍टर-१८ एमध्ये कुटुंबासह राहण्यास होता. गत आठवड्यात धनंजय हा पत्नीसह नातेवाईकाच्या लग्नासाठी गेला होता. त्यानंतर धनंजयची पत्नी कामानिमित्त काही दिवसांसाठी गावीच राहिल्याने तो एकटाच नवी मुंबईत परतला होता. त्याचा मेव्हणा शेजारीच राहण्यास असल्याने तो त्याच्यासोबत कधीतरी घरी राहत होता. मात्र, शनिवारी रात्री 12 वाजण्याच्या सुमारास धनंजय याने राहत्या घरात गळफास घेऊन आत्महत्या केली. त्यावेळी रात्री 12.30 वाजण्याच्या सुमारास शेजारी राहणाऱ्या मेव्हण्याने दरवाजा उघडण्याचा प्रयत्न केला असता, आतून धनंजयकडून काहीच प्रतिसाद न आल्याने त्याने खिडकी उघडून पाहिले असता, धनंजयने गळफास घेतल्याचे आढळून आले. त्यामुळे धनंजयला तत्काळ वाशी येथील पालिकेच्या रुग्णालयात दाखल केले. मात्र, तेथील डॉक्‍टरांनी त्याला मृत घोषित केले. धनंजय हा काही महिन्यांपासून आर्थिक अडचणीत सापडला होता. त्यामुळे आलेल्या नैराश्‍येतून त्याने आत्महत्या केल्याचे बोलले जात आहे. त्यानुसार नेरुळ पोलिसांनी याप्रकरणी आकस्मिक मृत्यूची नोंद करून, पुढील तपासाला सुरुवात केली आहे.