पनवेल : तळोजा फेस 1, सेक्टर 11 येथील एका इमारतीला रविवारी दुपारी भीषण आग लागली. या आगीत इमारतीच्या नवव्या मजल्यावर नऊ महिन्यांच्या बालकासह संपूर्ण परिवार तासभर अडकून पडला होता. आगीची माहिती मिळताच घटनास्थळी पोहोचलेल्या अग्निशमन दलाच्या जवानांनी संकटकालीन बाहेर पाडण्याचे मार्ग खुले करून इमारतीत भरून राहिलेल्या धुराला बाहेर पडण्यास वाट मोकळी करत आगीवर नियंत्रण मिळवण्यात यश मिळवले. या परिवाराला शर्थीच्या प्रयत्नांनंतर सुखरूप बाहेर काढले.

ही बातमी वाचली का? लॉकडाऊनमुळे सरकारी नोकऱ्यांना आला भाव... ते कसे काय जाणून घ्याच 

तळोजा फेस 1, सेक्टर 11 येथे असलेल्या ए के प्लाझा या इमारतीच्या सातव्या मजल्यावर रविवारी दुपारी शॉर्टसर्किटमुळे आग लागल्याची माहिती स्थानिकांनी दिली. इमारतीच्या सातव्या मजल्यावर लागलेल्या आगीमुळे संपूर्ण इमारत धुराच्या लोटांनी भरली गेली.  तसेच खालच्या मजल्यावरील सर्व रहिवाशांनी तत्काळ इमारत खाली केली. मात्र, नवव्या मजल्यावर नऊ महिन्यांच्या बालकासह संपूर्ण परिवाराला तासभर अडकून पडावे लागल्याची माहिती परिवारातील इम्रान पटेल यांनी दिली. 

ही बातमी वाचली का? चिंताजनक! एकट्या ठाणे जिल्ह्यातील कोरोनाबाधितांची संख्या 66 हजारांच्या उंबरठ्यावर, तर दिवसभरात...

11 मजल्याच्या या इमारतीमधील अग्निशमन यंत्रणा नादुरुस्त असल्याने यापूर्वीसुद्धा दोन वेळा इमारतीत आगी लागण्याच्या घटना घडल्या असल्याचे स्थानिकांचे म्हणणे आहे. नादुरुस्त असलेली यंत्रणा दुरुस्ती करावी याकरिता इमारतीच्या विकसकाकडे वारंवार विनंती करून रहिवाशाच्या विनंतीकडे विकसक दुर्लक्ष करत असल्याने रविवारी घडलेल्या घटनेत जवळपास 1 तासापर्यंत परिवारासह जीव मुठीत धरून घरात अडकून पडावे लागल्याचा संताप इम्रान पटेल यांनी व्यक्त केला आहे.
----------------------------
(संपादन : गोरक्षनाथ ठाकरे)