डोंबिवली : कोरोनामुळे नागरिकांवर आर्थिक संकट कोसळले आहे. पालकांना मुलांची शाळेची फी भरनेही मुश्किल झाल्याने मुलांचे शिक्षण आज पणाला लागले आहे. मुलांच्या शिक्षणात खंड पडू नये व पालकांवरही ताण येऊ नये म्हणून कल्याण मधील बालक मंदिर संस्थेने शाळेला आर्थिक मदत करण्याचे आवाहन केले आहे. कल्याण मधील इंदूताई देवधर यांनी 1949 साली पावलेले शिक्षणाचे रोपटे म्हणजे बालक मंदिर संस्थेची इंग्रजी माध्यमाची माध्यमिक शाळा. आज या रोपट्याचा वटवृक्ष झाला आहे. इंग्रजी माध्यम शाळेत सुरू झाले असले तरी शाळेत संस्कृती, संस्कार आणि मूल्यांची जपणूक केली जात आहे. उत्कृष्ट विद्यार्थी घडवणे हेच शाळेचे ध्येय असल्याने विद्यार्थ्यांच्या सर्वांगीण विकासासाठी शाळेत विविध स्पर्धा, उपक्रम, बौद्धिक परीक्षा, घेतल्या जात असल्याची माहिती बालक मंदिर संस्थेकडून देण्यात आली. (KDMC News)

गेल्या वर्षीपासून कोरोनाचे संकट असल्याने लॉकडाउन काळात अनेकांच्या नोकऱ्या गेल्या आहेत. पगारात कपात झाली आहे. या आर्थिक संकटामुळे घरखर्च भागवणे, मुलांची शाळेची फी भरणे अनेक पालकांना जमत नाही आहे. फी न भरल्यामुळे मुलांचे ऑनलाईन शिक्षण बंद झाल्याच्या घटनाही घडत आहेत. परंतु आपल्या शाळेतील मुलांच्या शिक्षणात खंड पडू नये यासाठी गरीब व गरजू विद्यार्थ्यांचा खर्च उचलण्यासाठी शाळेनेच दात्यांना आवाहन केले आहे.

पालकांसमोरील आर्थिक संकटामुळे त्यांच्या मुलांच्या पुढील शिक्षणाबाबत प्रश्नचिन्ह निर्माण झाले आहे. हे विद्यार्थी हुशार असल्याने त्यांचे भविष्य घडवण्यासाठी शाळेतर्फे मदत केली जात असली तरी अद्यापही आणखी आर्थिक मदतीची आवश्यकता आहे. त्यामुळे शाळेतील माजी विद्यार्थी, समाजातील दानशूर व्यक्ती, हितचिंतक आदींनी या विद्यार्थ्यांचे शिक्षण थांबू नये म्हणून पुढे येण्याचे आवाहन संस्थेतर्फे करण्यात आले आहे. यासाठी शाळेतील भाग्यश्री कुलकर्णी व त्रिवेणी शिंपी यांच्याकडे संपर्क साधावा असेही संस्थेने कळविले आहे.