डोंबिवली - रस्त्यावरून चालत जाणाऱ्या जेष्ठ नागरिकांना धक्का मारत त्यांना चाकूचा धाक दाखवून लुटणाऱ्या एक सराईत चोरट्याला कल्याण महात्मा फुले पोलिसांनी अटक केली आहे. शाहिद बेरिंग असे आरोपीचे नाव असून पोलिसांनी त्याच्याकडून चोरी केलेला मुद्देमाल देखील हस्तगत केला आहे.

कल्याण पश्चिमेत राहणारे 60 वर्षीय अब्दुल हमीम गणी शेख हे रात्रीच्या सुमारास पायी घरी चालत जात होते. यावेळी आरोपी शाहिद बेरिंग याने गणी यांना जाणूनबुजून धक्का देत मारहाण केली. त्यानंतर त्यांना चाकूचा धाक दाखवून त्यांच्याजवळ असलेला मोबाईल आणि रोख रक्कम असा 24 हजाराचा मुद्देमाल काढून घेत पसारा झाला.

या प्रकरणी अब्दुल गणी शेख यांनी कल्याण महात्मा फुले पोलीस ठाण्यात तक्रार दाखल केली होती. त्यानुसार महात्मा फुले चौक पोलीस ठाण्याचे वरिष्ठ पोलीस निरीक्षक अशोक होनमाणे यांच्या मार्गदर्शनाखाली क्राईम पीआय प्रदीप पाटील,

सहायक पोलीस निरीक्षक दीपक सरोदे, भालेराव, पोलीस हवालदार चिते,कांगरे,थोरात,धाम्हणे या टीमने तक्रारदारांनी दिलेल्या वर्णनाला प्रमाणे परिसरात सर्च ऑपरेशन करत 24 तासाच्या आत कल्याण पश्चिम परिसरात सापळा रचून आरोपी शाहिद बेरिंग याला अटक केली.

त्याच्याकडून चोरी केलेला मुद्देमाल देखील हस्तगत केला आहे. पोलिसांच्या माहितीनुसार शाहिद हा सराईत आरोपी असून त्याच्यावर ठाणे जिल्ह्यात अनेक गुन्हे दाखल आहेत. सध्या शाहिद महात्मा फुले पोलिसांच्या ताब्यात असून त्याने अजून किती गुन्हे केले आहेत व त्याचबरोबर कोण सहभागी आहेत याचा तपास महात्मा फुले पोलीस करीत आहे.